Sagen om selvstyrets retschef
Taamaattumik oqaaseqarneq ajorpugut
Namminersorlutik Oqartussat iluanni pissutsinik tusagassiorfiit pitsaanngitsumik samminnittarnerat Siulittaasup Naalakkersuisoqarfiani pisortap Svend Hardenbergip ajuusaarutigaa
– Erseqqissaatigissavara Namminersorlutik Oqartussani pisut pillugit Naalakkersuisut allaffeqarfimmiluunniit atorfilittat oqaaseqarneqarneq ajormata.
– Oqaaseqartoqarneq ajorpoq assersuutigalugu inuit ataasiakkaat pillugit sulianut tunngatillugu paasissutissat inunnut ataasiakkaanut tunngasut tassani kalluarneqarsinnaammata. Oqaaseqarneq ajorpugut Namminersorlutik Oqartussat qajassuunneqarnissaat siunertaralugu - inuilli ataasiakkaat mianerinissaat pissutigalugu – tamatumalu kingunerivaa tusagassiuutit aqqutigalugit pitsaanngitsumik maanna samminnittoqarnera.
Taamatut allappoq Siulittaasup Naalakkersuisoqarfiani pisortaq Svend Hardenberg.
Tamanna pivoq AG-p oqaluttuarimmagu namminersorlutik oqartussani inatsiseqarnermut pisortaq Andreas Salmony - aviisimut paasissutissiisut imminnut attuumassuteqanngitsut pingasut aterminnik isertuussisut malillugit - juunimi soraarsinneqarsimasoq pissutigalugu Julie Rademacherip Naalakkersuisut siulittaasuanni atorfinitsinneranut pissutsit pillugit mail-it aviisimut tunniunneqarnissaat kimigiiserutigisimammagu.
– Namminersorlutik Oqartussani allaffeqarfiup Naalakkersuisullu qanoq ilioriarnissaannik ajornakusoortitsisinnaasumik suliffeqarfimmi pisut pillugit oqaluttuat annerusumik minnerusumilluunniit tunngavilersorneqanngitsut saqqummiunneqartarput.
Taama pisoqartillugu tunngavittut ileqqorisatta, tassalu oqaaseqartannginnerup, ikiorsertanngilaatigut. Amerlasuutigut kissaatigisaraluarparput inuiaqatigiit pisut pillugit tamakkiisumik ilisimasaqarnissaat. Oqimaaqatigiissitsiniarnerlu tamatigut unammillernartarpoq, Svend Hardenberg nassuiaavoq.
Atuaruk "Namminersorlutik Oqartussani inatsiseqarnermut pisortaq sooq soraarsinneqartoq AG-p paasivaa"
Atuaruk: "Demokraatit: Naalakkersuisutilu tunuarniarit, Aleqa"
Allaffeqarfimmi pisortaanerit ataatsimeeqatigissavai
– Taamaattumik inuiaqatigiinnut paasissutissat ingerlatinneqartarnerannut tunngasoq apeqqut Naalakkersuisoqarfiit pisortaasa tulliani ataatsimiinnissaannut oqaluuserisassanngortilersaarpara. Neriorsuutigisinnaanngilara periuutsit allanngortinneqassasut, uannulli pingaarpoq apeqqut pineqartoq piaarnerpaamik pisortatut qullersat akornanni oqaluuseritissallugu, Svend Hardenberg tusagassiorfinnut allakkamigut allappoq, tassanilu ilanngullugu allappoq ´sallerpaatillugu siulliullunga ajuusaarutigissavara´ namminersorlutik oqartussat iluanni pisut tusagassiorfinnit pitsaanngitsumik sammineqartarnerat.
– Naalakkersuisut ataasiakkaat allaffissornermut tunngasunut apeqqutinut oqaaseqartanngillat, soorlulusooq politikkimut tunngasunut apeqqutinut Naalakkersuisoqarfiit oqaaseqartanngitsut. Pisortaasoq sulisorisarluunniit oqaaseqanngippata tamanna ima isumaqanngilaq pisoq pissusissamisuunngitsoq – periarfissalli eqqartussavagut qanoq isilluta pitsaanerulersinnaanersugut.
Sermitsiaq.AG-p Svend Hardenbergip akissuteqarnissaa utaqqivaa, aaqqissuisoqarfiup ilaatigut erseqqissaqqugamiuk qanoq isumaqartoq oqarami ´suliffeqarfimmi pisut pillugit oqaluttuat annersumik minnerusumilluunniit tunngavilersorneqanngitsut saqqummiunneqartartut´ .
Allaaserisaq "Inatsit malinniaramiuk pisortaq soraarsitaavoq", AG-mi sapaatip akunnerani saqqummersumi taannalu pisiarisinnaavat uani: