Mersortartut sapiitsut
Taamaammat qanga inuit sikumi inuusinnaasimapput
Qanga alersip takutippaa, inuiaat Kalaallit issittumi inuuniallaqqinnerat
Inuit Saqqaminngaanneersut immikkuullarissumik mersoriaaseqarsimapput taamaasillutillu sikumi inuusinnaasimallutik. Tamanna amermik alersialiamik nassarnikkut uppernarsarneqartoq, videnskab.dk allaaserinnippoq.
Alerseq arlaleriarluni putunguata nalaatigut ilaartorneqartarsimavoq
- Ukiuni 4.000-ini nunaannarmiissimangami kusanarpallaanngikkarluarpoq. Taannatuaavorli qularnaatsumik oqaatigisinnaasatsinnik Saqqami atisanik nassaarisimasarput, mersoriaaseq immikkuullarissuuvoq, Nationalmuseetimi itsarnisarsiooq Bjarne Grønnow, Videnskab.dk-mut oqaluttuarpoq.
Alersip mersorneqarsimanera qimerlooraanni mersoriaaseq allaalluinnartoq takuneqarsinnaavoq, alersersermi kilunngaatitaqanngilaq tamaallu atorluarneqarsimalluni. Alersip iluani iluaassinnaasumik soqanngilaq, atisanullu tamanna iluaqutaasaqaaq, aserfallattaaliuisoq Anne Lisbeth Schmidt oqarpoq.