toqukkut qimaguttoq
Taamaammat Nuup talittarfiani erfalasoq qiteqqusimavoq
Aalisarnerup silarsuaani ilisarisimaneqarluartoq Petrus Biilmann atorfimmi allami aallarteqqammerluni tassanngaannartumik toquvoq.
62-inik ukiulik Petrus Biilmann KNAPK-mi ukiorpassuarni pisortaareerluni ullualuit qaangiuttut allami atorfeqarlerpoq.
Atorfittaaqqammerpoq
Unammilligassanik allanik misililiiumalluni Aalisarnermut Piniarnermullu naalakkersuisoqarfiup immikkoortortaani pisortanngorpoq. Sapaatip akunneratalu siuliani apriilip pingajuani atorfittaaminut perngaammik suliartorluni. Ullualunnguillu qaangiuttut naalakkersuisoqarfimmi ukiualuit qaangiuttut allaffimmi pisortaaffigisimasamini takussaajunnaartussanngorpoq.
Petrus Biilmann Maniitsumi inunngorpoq peroriartorltoq Ikastimi Vestjyllandimiittumi niuertutut ilinniarnikuuvoq. Ilinniareeramilu Nunatsinnut utereernermini aalisarnerup silarsuaani suleqataalluartarnermigut ilisarisimalluarneqarlernikuulluni. Ukiullu arlallit Sisimiuniissimalluni.
Suliffeqarfippassuit suleqatigisareerlugit aalisartut kattuffianni KNAPK-mi pisortanngorpoq.
Ujakkaarnermi pissartaq
Qanga ujakkaarnermi pissartaasimasoq taekwondomilu qernertumik qiterutilik piffissaq eqqorlugu takkuttartuuvoq.
- Arfineq-pingasunooqqugaanni piffissaq eqqorlugu takkutissasoq qularutissaaneq ajorpoq, Tønnes O.K. Berthelsenip eqqaamasalikkersaarpoq. Taanna KNAPK-mi pisortamut tullersortaanermini Petrus Biilmann qanimut suleqatiginikuuaa.
KNAPK-mi pisortaasimasoq anguniagaqallaqqittorlu aalisartut piniartullu kattuffianni 2013-mi aaqqissuusseqqinnerani suleqataavoq. Aaqqissuusseqqinnerullu kinguneranik ilaasortat amerleriaateqarsimasoq kattuffiup misigaa.
Piffissamik ataqqinnittoq naapertuilluartorlu
Tønnes O. K. Berthelsenimut Petrus Biilmann akornatsinniikkunnaarnera upperiuminaappoq, arfininngormammi ajoquteqarani qiimallunilu ataatsimeeqatigaa.
Angut ataqqinaatilik Nunatsinnilu aalisarnikkut annertoqisumik sunniuteqaqaataasoq toqukkut qimagunnerata Nuup talittarfiani erfalasorpassuit qiteqqusimaneranni pissuteqarpoq.