oqallinneq
Taamaammat angerlarneq ajorpugut
Politikerit aamma qallunaat ilisimaatsut issiaveeqqamut nipputiinnaqqasut - inissaqarnermullu atukkat ajornartut - inuusuttut ilinniarluarsimasut Danmarkimi ilinniareeraangamik uterneq ajornerannut pisuutinneqarput
Bloggertartoq Aviaja Lyberth Hauptmann, Danmarkimi DTU-mi ph.d.-itut ilinniartoq kinguaariinnut siuliminut Ingeniørenimi ilanngutassiamini sakkortuumik isornartorsiuivoq.
Atuaruk: Inuussuttoq aallarnisaasoq politikerinut: Ilissi ajornartorsiutaavusi!
Aviaja Lyberth Hauptmannip kalaallit aallarnisaanermut anersaamik amigaateqarnerannut oqallinneq JJ Lennert-Sandgreenimit pilersinneqartoq nangillugu oqariartuutigaa, inuiaqatigiinnut tapeeqataajartorlutik ilaatigut nammineerluni angerlannginneranut pissutaasut arlaqarnerarpai.
- Paasisinnaavara atugassat killeqarnerat aamma kalaallinut ilinniarluarsimasunut tamanut suliffinnut pilerinartunut neqeruuginnartoqarsinnaanngitsoq. Kisianni angerlarlutik nutaamik pilersitserusuttunut aporfilersuineq nuannersortaqanngilluinnarpoq, Aviaja Lyberth Hauptmann Kalaallit Nunaat pillugu bloggimi ilanngussamini kingullermi allappoq.
Taanna inatsimmik allannguinermut unnersuussivoq, taanna naapertorlugu ilisimatusarnissamut qinnuteqaatit tamatuma annertuunngortillugu akisuunngortissimavai. Ilinniartoq inuusuttoq naapertorlugu politikerinit ilisimaatsunit tamanna aalajangerneruvoq.
Atuaruk: Biotek pillugu siunnersuummik isornartorsiuineq
- Kalaallit politikerit amerlanngitsut ensymit suunersut susinnaanersullu ilisimanngilaat, taama isornartorsiuivoq.
Qallunaat unammilleqatigiinnermut sungiussisimanngitsut
Kisianni Aviaja Lyberth Hauptmannip aamma atorfinni pitsaasuni inunnik kinguaariinnut tulliuttunut akisussaaffimmik tunnissinissamut piareersimanngitsunik inuttaqartoqartillugu unammilligassaasinnaasoq oqaatigaa.
- Kalaallinut angusaqarluarusuttunut piginnaasunut Kalaallit Nunaannik ingerlariartitseqqittussanut ilumoortumik piareersimasoqanngila? Qallunaat ilaat Kalaallit Nunaanni sulilluarsimasut pissaaneq kalaallinut tunniunnissaanut piareersimannginneranni eqqarsaammi paasinartoqarpoq. Unammillernerminnut naligiittumut sungiussisimasoqanngilaq. Kalaallinik assinganik imaluunniit pitsaanerusunik piginnaasalinnik unammillerteqarnissamut sungiussisimanngillat, bloggertartoq ilanngutassiamini allappoq.
Namminersorlutik Oqartussat kisiisa aqqutigalugit inissat
Tamatuma saniatigut Nuummi inissarsinissap ajornartorsiutaannaanani nuunnissamut aporfiusoq aamma oqaatigaa.
Atuaruk: Isornartorsiuinerup kingorna: Politikerit inuusuttoq aallarnisaasoq naapikkusuppaat
- Allatut oqaatigalugu ilisimatusartutut aningaasaateqarfik aqqutigalugu atorfinillunga iluatsitsissagaluaruma Nunatsinnullu nuunniarlunga, taava suliffik aqqutigalugu inissarsisinnaanngilanga, taanna Nuummi tikittunut nalinginnaanerpaallunilu initaarneq akikinnerpaavoq. Amerlasuut atorfitsik aqqutigalugu (Namminersorlutik Oqartussat) pissarsisarnerat pissutigalugu, Nuummi inissaqarniarneq Københavnimit allaaneruallaanngilaq. Ilaquttakkalu Nuummi inissiamik attartugassamik ullumi Østerbromi akilertakkatsinnik akisunermik akiliisalissagaluarpugut ... Tamanna uggornartoq isumaqarpunga, Aviaja Lyberth Hauptmann allappoq.