kommuninut qinersineq 2017
Taaguunneqarluarsimasoq kinguneqartitseriaannaasoq
Atassut sinnerlugu taaguunneqarluarsimasoq Siverth K. Heilmannip, borgmesterinngortussap partiit pingasut sinnerlugit ataasinngormat suleqatigiinnissamut isumaqatigiissutigisimasaat akuersaanngilaa. Partiit pingasuusut uku pineqarput: Siumut, Inuit Ataqatigiit kiisalu Partii Naleraq.
Qeqqata Kommuniani kina borgmesteriussanersoq borgmesterimulli sinniisussanngornersoq oqartussaaffiillu kikkunnit tigummineqassanersut isumaqatigiissutigineqaqqammerput.
Atuaruk: Qeqqata Kommuniani Siumut pissaaneqarluartoq
Oqartussaaffiit pingaarnerit pingasut ima isikkoqarput, Siverth K. Heilmannilu aallaavigalugu maleruaqqasanik unioqqutitsineruvoq.
- Borgmester: Malik Berthelsen
- Borgmesterip sinniisaa: Gedion Lyberth (S)
- Borgmesterip sinniisissaata tullia: Inuit Ataqatigiit
"Nalunngilara suna eqqartornerlugu"
- Illuatungiliuttut minnerpaamik borgmesterimut tullertut sinniisussaatitaqartussaagaluarput. Partiit taakkua isumaqatigiissusertik attatiinnassappassuk kinguneqartitsiumaarpunga. Ukiuni 28-ni politikkeriusimavunga – taakkunani ukiuni arfineq pingasuni borgmesteriusimallunga – taamaammat nalunngilara suna eqqartornerlugu, Siverth K. Heilmann, qinersinermi 596-nik taaguunneqarluni Nunatsinni taaguunneqarnerpaanut tulliuvoq, Asii Chemnitz Narupimit Nuumminngaanneersumit taamaallaat qaangerneqarsimalluni.
Atuaruk: Siverth K. Heilmann: Qinersisartut nuannaarivaannga
Taassuma kommunalbestyrelsitoqqap kommunalbestyrelsinngorlaallu ulloq 25. aammalu 26. april ataatsimeeqatigiissasut Sermitsiaq.AG-mut paasissutissiaraa. Tassani kommunalbestyrelsinngortut inissititerneqarnerat aalajangiuffigineqassalluni.
Naammagittaalliornissani utaqqitippaa
- Naatsorsuutigaara minnerpaamik borgmesterimut sinniisaattut tullertut oqartussaaffiup uatsinnut tunniunneqarnissaa. Aap, neriuutigaara partiit pingasuusut paasisaqalaarsimassasut, taamaammat nunami namminermi naalakkersuisoqarfimmut naammangittaalliuuteqarnissani utaqqisikkallarniarlugu, Siverth K. Heilmannip, Sermitsiaq.AG-mut oqaatigaa.
Atassut ilaasortanngortitaalu pingasut isumaqatiginninniarnernut peqataasimangaluartut, Sisimiuniilli Kangerlussuarrmut aqqusinissaq avissartuussutigisimagaat taassuma paasissutissiaraa.
Aqqusineq akisooq
Aqqusineq hunnoruju millionit sinnilimmik akeqartussaq Atassummiik isumaqataaffigineqanngitsoq, Siverth K. Heilmann paasissutissiivoq.
- Ukiorpassuarni kommuni aqqusinniornissamut ukiumut 30 million koruunit immikkoortitsisassappat, kommunip aningaasaqarneranut innarliissaaq. Tamannalu uagut taperserusussimanngilarpunga, taanna paasissutissiivoq. Aputillu aattarnerani aqqusernup aserfallatsaalisartarneqarnissaa aamma akisoorujussuussasoq, taassuma tikkuarpaa.
Sermitsiaq.AG-miit Siumup borgmesterinngortitassaa Malik Berthesen oqaaseqartinniaraluaratsigut pissarsiarisinnaasimanngilarput.