nappaatit

Syfilisertunut ernumanartumik amerliartuinnartunut iliuuseqarneq

Kinguaassiutitigut nappaateqartartut ernumanartumik amerlasoorujussuupput. Toqussutigineqarsinnaasumik aamma tuniluunnikkaasumik syfilisertut amerleriarsimapput. 2010-miilli nappaateqartoqanngeriarluni siorna 71-t paasineqarput.

Ubeskyttet sex er årsag til et meget højt antal kønssygdomme.

Gonorértut aamma klamydiartut ernumanartumik amerlassuseqarput, tassa 1.323-t aamma 3.051-t 2016-imi paasineqarsimallutik.

Iliuuseqartoqalersoq
Taamatut ineriartortoqarnerata naalakkersuisoq Agathe Fontain qisuariartippaa. Tamanna sumiiffinni tamani annertuumik ukkatarineqartoq Sermitsiaq.AG-mut nassuiarpaa, kisianni ''tunillaasimasunik ujartuilluni sulinerup pitsaassusaa suliaqartussanik ajornartorsiornerup sunneraa''.

Peqqinnissaqarfiup ''peqqinnartumik atoqateqartarnermik'' suliaanut periusissamik iliuusissanullu pilersaarummik peqqinnissaqarfik pilersaarusiuleruttortoq, kiisalu pitsaaliuinermik kinguaassiutitigullu nappaatinik katsorsaanermik suliaqartoq.

- Pineqartoq peqqinnissaqarfimmit kisimi kivinneqassanngimmat susassaqarfinnit allanik qanimut suleqarteqarluni aamma ataqatigiissaaraluni kivinneqassaaq, Agathe Fontain ilisimatitsivoq.

Nunatsinni Nakorsaaneqarfiata naqissuserpaa, syfilisip tunillaassuunnera ernumanartoqartoq.

- Taamaammat usuup puuanik atuilluni isumannaatsumik atoqateqartarnissaq oqariartuutaavoq pingaarutilik. Tamatuma saniatigut Nappaatip suussusersineqareernerani tunillatsissimasinnaasunik paasiniaanermi peqataanissamut piumassuseqarneq nappaatip tuniluunnerata annikillisinneqarnissaanut sakkussaavoq pingaarutilik.

Ilinniartunut pulaarneq
- Ukioq manna illoqarfiit ilinniartoqarfiusut, Sisimiut aamma Qaqortoq tikeraarpakka. Tassani inuusuttunut ilinniartunut peqqinnartumik atoqatigiinneq pillugu saqqummiivunga oqallinnertalimmik. Tamarmik orningarneqarluarput, sammisarlu oqallisigineqarluarpoq. Ukiup naannginnerani illoqarfiit ilinniarfiusut sinneri tikeraarniarpakka, naalakkersuisoq Agathe Fontain oqarpoq.

Arnat nalunaarsorneqartut amerlanerusut
Naatsorsueqqissaartarfik naapertorlugu arnat kinguaassiutitigut nappaateqartut nalunaarsorneqartut amerlanerupput. Arnat assersuutigalugu naartunerminni imaluunniit erninerminni tunillatsissimallutik paasinnittarnerat, tamatumunnga nassuiaatissartaavoq.

Angutit tunillatsissimanerannut kisitsisit takusassiarineqarsimasut allatut oqaatigalugu amerlanerujussuusinnaapput.

Nunatta Nakorsaaneqarfiata kisitsisit Naatsorsueqqissaartarfimmut tunniussaat Dronning Ingridip Napparsimmavissuani qitiusumik laboratoriaaneerput.

Powered by Labrador CMS