Sverigimut ikiuiartorneq misigisaqarfiulluarsimavoq

Qatserisartut pingasut Avannaata Kommunianeersut Sverigemi orpippassuarnik ikualloqartoqarneranut atatillugu ikiuiartortitat sulinertik naammassillugu misigisaqarluareerlutillu angerlarput.

Lars Kristiansen Sverigemi illoqarfiit pingaanersaata Stockholmip avannamut 300 kilometerit sinnilaarlugit ungasitsigisumiittumut ornigutsinneqarpoq, KNR-mullu oqaluttuaraa orpissuit nunalu ikuallannikut tikileramigit assut pikkunanaarsimallugu.

Imermik pilersuineq

- Uagut gruppitsinni imermik pilersuinermik taavalu siaruitsaaleeqqinnermik suliaqartuuvugut, ilagut ikuallaffiunerusumiipput. Kisianni uagut suli pujortut sulilu ikuallattut aamma qatsertarpagut, Lars Kristiansen KNR-imut oqarpoq.

Taanna Bûjo Søholm Knud Hammondilu Sverigemi nunatsinnit ikiuiartortinneqarput.

Immikkut misigisaqarneq

Angalaneq tamarmik immikkut misigisaqarfigisimavaat. Lars Kristiansenip tikkuarpaa, allanik suleqateqaleriataarsinnaaneq taavalu inuiaat allaanerusut suleqatigilersinnaanerannut ilikkagaqarfigisimallugu. Nunamilu ikuallattoqarnerani atortuutit qanoq atorsinnaaneri aamma ilikkagaqarfigisimavaat.

Powered by Labrador CMS