Ulloq suliffik naannerusoq
Sverigep ullormut akunnerni arfinilinni sulisarneq eqquppaa
Sverigemi suliffeqarfiit kattuffiillu arlallit ullormut akunnerni arfinilinni sulisalersitsipput tunisassiorneq annertusarniarlugu
Ulluinnarni nalunaaqutaq qulingiluaniit ualikkut pingasut tungaanut sulisarnissat qanoq igissaviuk?
Sverigemi suliffeqarfinni kattuffinnilu arlalinni ullormut akunnerni arfinilinni sulisarneq eqqunneqarpoq.
Taamatut allappoq Science Alert.
Plejehjemmit, napparsimmaviit, biiliiniarfiit aammalu kattuffiit suliffeqarfiillu allarpassuit ullormut akunnerni arfinilinni sulisarneq eqquppaart, tunisassiorneq annertusarniarlugu sulisullu inuulluarnissaat eqqarsaatigalugu.
Akunnerit arfineq-pingasut sivisuallaaqaaq
– Akunnerni arfineq-pingasuni sulisarneq ilimagineqarsinnaasutut pitsaatiginngilaq. Akunnerni arfineq-pingasuni suliassap aalajangersimasup samminissaa unammilligassarujussuuvoq. Tamanna pissutigalugu ulloq iliuutsinut aggulunneqartarpoq pausertoqartarlunilu, ulloq suliffik attassinnaanerujumallugu. Tamannalu peqatigalugu suliffiup avataani inuinnartut inuuneq ataqatigiissikkuminaannerulersinnaavoq, Filimundusip pisortaa Linus Feldt Science Alertimut oqarpoq.
Tusagassiorfik naapertorlugu Sverigemi napparsimmaviit ilaanni nakorsat peqqissaasullu ulloq sivikinnerusumik suliffik atulereersimavaat.
Suliamut tunniusimanerulerneq
Tusagassiorfik aamma allappoq Göteborgimi plejehjemmimi allannguineq tamanna ukioq manna siusinnerusukkut ingerlanneqarsimasoq, 2016-ip naanerata tungaanut misileraatitut.
Tamatuma kingorna nalilerneqassaaq sulisunik nutaanik, akunnernut annaasanut matussutissatut, atorfinitsitsinermi aningaasartuutit, matuneqarsimanersut napparsimasunik pitsaanerusumik passussinermik aammalu sulisut akornanni suliamut tunniusimanerulernermik.