ammaanersiorneq
Svenskit pingasut Nuummi saqqummersitsissapput
Nuummi Eqqumiitsulianik Katersugaasiviup sisamanngormat saqqummersitsineq ´Tre´(´Pingasut´) ammarnersiussavaa
Svenskit eqqumiitsuliortut pingasut, Björn Krestensen, Jöran Östermann Thomas Colbengtsonilu sisamanngormat Nuummi Eqqumiitsulianik Katersugaasivimmi saqqummersitsissapput.
Saqqummersitsineq taaneqarsimavoq ´Tre´, eqqumiitsuliortullu tassuuna takutinniarpaat Savalimmiut, Sverigep Kalaallit Nunaatalu naapinnerat.
Eqqumiitsuliortut pingasut taamaasiornermikkut takuniarpaat eqqumiitsuliat qanoq pisarnersut, eqqumiitsuliortup kulturit allat naapikkaangagit.
Assigiinngitsunik eqqumiitsuliortut
Katersugaasivik allappoq Jöran Östermannip eqqumiitsuliai tassaasut qaqorteqqasunik pappialaliamut saattuararsuarmut assilialiat, titartakkat, atortunillu katitikkanik eqqumiitsuliat. Björn Krestensenip eqqumiitsuliai assilialianik assigiinngitsunik eqqumiitsuliaapput, Calbengtsonillu ini saqqummersitsivik sapinngisamik pitsaanerpaamik atorniarsariniarpaa.
Svenskit eqqumiitsuliortut pingasut saqqummersitsinermikkut tassuuna kalaallit, savalimmiormiut svenskillu suleqatigiinnissaat aallartisarniarpaat, neriuutigaallu taamatut kulturikkut naapeqatigiinnikkut eqqumiitsuliortut nunanit assigiinngitsuneersut suliniutikkut tassuuna imminnut aammalu kulturiminnik eqqumiitsuliaminnillu ilikkaqatigiinnerusinnaassasut.
Ilulissaniissimapput
Eqqumiitsuliortut qanittukkut Nuummut Ilulissanullu tikeraareersimallutik misigisimasimapput Kalaallit Nunaannik Savalimmiunillu takunninnermikkut isumassarsiorluarsimallutik, kulturinillu allanik naapitsinerminnit saqqummersitsinissartik qilanaaraat.'