futsal
Svenskit futsalertartui pissartanngorniunnissamut peqatigiiffinnik marlunnik ujartuisut
Septembarip qaammataani svenskit illoqarfiani Örebromi futsalimik pissartanngorniuttoqassaaq. Pissartanngorniunnermi Finlandiminngaanniik Sverigeminngaanniillu peqatigiiffiit marluk peqataassaapput. Kalaallit Nunaannilu peqatigiiffiit marluk pissartanngorniunnissamut nalunaarsinnaapput.
Svenskit futsalertartut peqatigiiffiat, Ösk, septembarip qaammataani futsalimik pissartanngorniunnermik aaqqissuissaaq, Örebro Open Internationella, tassani Finlandiminngaanniik peqatigiiffiit marluk peqataassaapput taamatullu Sverigemit peqatigiiffiit marluk.
Aaqqissuisut neriuutigaat peqatigiiffiit marluk Nunatsinneersut pissartanngorniunnermi peqataasinnaassasut.
- Neriuutigaarput Kalaallit Nunaanni peqatigiiffiit pitsaanerit marluk pissartanngorniunnermi peqataasinnaassasut, pissartanngorniunnermimmi aaqqissuussineq annertuujuvoq, Johan Ivhall svenskit peqatigiiffianit Öskimeersoq, Sermitsiaq.AG-mut oqarpoq.
Ösk Sverigemi futsal-ligami qaffasinnerpaami ulluinnarni unammeqataasarpoq.
Taassuma oqaatigaa, peqatigiiffinnik marlunnik aggersaanissamut periarfissaq takkussimasoq finlandimeersut peqatigiiffiit marluk nalunaarnerata kingorna,
- Pissartanngorniunnerit septembarip 15-nit 17-ata tungaanut ingerlanneqassapput, Johan Ivhall oqarpoq.
Peqatigiiffiit soqutiginnikkunik ukununnga attaveqarsinnaapput: johan.ivhall@oskfutsal.se imaluunniit erik.klint@mail.com.
Nalunaarnissamut killigitiinneqarpoq ulloq 12. juni, paasissutissiarineqarpoq.