Naalakkersuisoqarfiit
Svend Hardenbergip siunissaa suli oqaatigiumaneqanngilaq
Naalakkersuisut siulittaasuata Naalakkersuisoqarfiani pisortaasup Svend Hardenbergip atorfimminit tunuartinneqarallarneranit susoqassanersoq oqaatigiumaneqanngilaq. Atorfimminit tunuartinneqarallarpoq sapaatit akunneri marluk matuma siorna
Naalakkersuisut siulittaasuata Naalakkersuisoqarfiani pisortaasup tunuartinneqarallarneranut apeqqutit amerlapput. Tassungalu atatillugu apeqqutigineqartunut akissutigineqartut aallaavigalugit suli paasineqarsinnaanngilaq Naalakkersuisut siulittaasuata Naalakkersuisoqarfiani pisortaasoq Svend Hardenberg atorfimminut uteqqissanersoq.
Sermitsiaq.AG-miimmi paasiniarneqaraluarpoq Svend Hardenberg atorfimminut uteqqissanersoq. Atorfimminit februaarip 24-ani tunuartinneqarallarpoq, sulileqqinnissaalu naatsorsuutigineqarluni.
Apeqqutigineqartulli erseqqissumik akissuteqarfigineqanngillat.
- Svend Hardenberg atorfimminit suli tunuartinneqarallaqqaneqarpoq. Pisoq inunnut ataasiakkaanut attuumassuteqartuuvoq, taamaattumik apeqqutigineqartut akineqarsinnaanngillat. Inunnut ataasiakkaanut tunngassuteqartut Namminersorlutik Oqartussanit oqaaseqarfigineqarneq ajorput, Naalakkersuisut siulittaasuata Naalakkersuisoqarfianit Sermitsiaq.AG-mut allattoqarpoq.
Naalakkersuisut siulittaasuata Naalakkersuisoqarfiani atorfimminut uteqqissanngikkaluarpat qanoq aningaasarsiaqartinneqassanersoq aaqqissuisoqarfimmit paasiniarneqaraluarpoq. Aamma suliffimminit tunuarnerminit allanik akissarsiaqartinneqassanersoq paasiniarneqaraluarpoq.
Paasissutissiisoqanngilaq
Ilaqutariinnermut Naligiissitaanermut Isumaginninnermullu Naalakkersuisoqarfimmi pisortatut Susie Marthin Kjeldsen tunuartoq Sermitsiaq.AG-mit marsip sisamaani allaaserineqarpoq. Qaammatinut 18-inut naapertuuttunik utoqqalinersiassat ilanngullugit tunuareernerminit aningaasarsiaqartinneqassasoq allaaserineqarpoq.
Ilaqutariinnermut, naligiissitaanermut, isumaginninnermullu naalakkersuisoq Martha Lund Olsen, Siumut, aamma Naalakkersuisoqarfimmi pisortaasoq Susie Marthin Kjeldsen akornanni susoqarsimanersoq apeqqutaaginnalerpoq.
Assinganik aamma Naalakkersuisut siulittaasuata Kim Kielsenip aamma Naalakkersuisoqarfimmi pisortaasup Svend Hardenbergip akornanni susoqarsimanersoq aamma apeqqutaaginnalerpoq.
Aviisimi Sermitsiami allaaserineqartoq 'Atorfinititsineq soraarsitsinerlu 1,6 million koruuninik naleqartoq' atuarneqarsinnaavoq. Aviisi uani pisiariuk: