Svend Hardenberg: Saaffiginnittoqarmat misissuivugut

- Michael Binzerip oqaatsini nammineq akisussaaffigai. Oqaasii eqqunngillat.

Naalakkersuisut Siulittaasuata Naalakkersuisoqarfiani pisortaq Svend Hardenbergip Michael Binzerip isornartorsiuineranut oqarpoq. Michael Binzeri oqarpoq Naalakkersuisut Siulittaasuata Naalakkersuisoqarfiani atorfeqartup ataatsip ilinniagarisimasani pillugit misissuisimasoq. Misissuinerup paasinarsisippaa Michael Binzerip ilinniarfigisimanngisani aamma ilanngullugit allattarsimagai.

- Ilinniagarisimasanni paasissutissiigaangama ilinniarfiit naammassinikuunngisakka aamma ilanngullugit allattarpakka. Sungiusaanermut kisimi 'taamaallaat' ilinniagaqarpunga Norgep timersornikkut højskoleani. Ujakkaarneq aallunniarlugu ilinniagaraara, Michael Binzer blogimini allappoq.

Misissuinerit
- Svend Hardenberg, Michael Binzer ilaatigut allappoq: 'Paasisinnaanngilara sooq Naalakkersuisut Siulittaasuata Naalakkersuisoqarfiani atorfeqartup ataatsip ilinniagarisimasakka misissuiffigilernerai. Namminersorlutik Oqartussat pillugit kiisalu kusanaatsuliornerit pillugit isummersortarnikka pissutaallutik aatsaat misissuiffigineqalerpat? Taama isornartorsiuisoqarnera qanoq oqaaseqarfigisinnaavigit?

- Michael Binzerip ilinniagarisimasaanik apeqqutilliisoqareersoq misissuilluta aallartippugut, tassani pineqartup ilinniagarisimasai misissulerpavut. Ingerlatseqatigiiffinnut Allattoqarfimmi taanna suliaraarput. Saaffiginnissutit taamaattut ilungersunartutut isigisarpagut. Saaffiginnittoqareeraangat aalajangersaasarpugut annertunerusumik misissuisoqassanersoq.

- Misissuinerup suut takutippaat?

- Paasivarput Michael Binzerip ilinniarfinni misilitsinnerit ilaat angusiffigisimanngikkai imaluunniit aamma unitsiinnarsimagai. Taanna pereermat ilinniarfigisimasatut aamma allannikuusai misissuiffigaavut. Tassani paasivarput ilinniagarisimasutut allataa ilinniarfiunngitsoq, Svend Hardenberg oqarpoq.

Periuutsit allanngortinneqartut
- Tassunga suliaqarnersi taava qanoq sunniuteqarpa?

- Taamatut pisoqaqqinnginnissaa anguniarlugu periuuserineqartartut allanngortippavut. Tassa siulersuisuni ilaasortaalersussat akuersitinneqartalissapput ilinniarfigisimasaannik misissuisinnaalissalluta.

- Michael Binzerip ilinniagarisimasai pillugit qanga ilissinnut saaffiginnittoqarpa?

- Oktobarimi saaffiginnittoqarpoq. Paasissutissat paasereeratsigit suleriaatsivut ingerlaannaq allanngortippavut, Svend Hardenberg oqaluttuarpoq.

Michael Binzer Air Greenlandimi pisortaanertut atorfeqareernermi kingorna Tele-Postimi pisortaanertut atorfeqalerpoq 2013-mi apriilip aallaqqaataanit. Atorfimmit Michael Binzerip soraarniuteqarnera septembarip qulingani nalunaaruteqartoqarpoq.