Kommuninik nalilersuineq
Suut ingerlalluarsimapput suut ingerlanerlussimappat
Naatsorsuutigineqarpoq kommunit kattunnerisa nalilersorneqarnera ukiunik marlunnik sivisussuseqassasoq. Aatsaat aappaagu kommunit angissusaat nalilersorneqassaaq
Aningaasanut nunamilu namminermi pissutsinut Naalakkersuisup Vittus Qujaukitsup kommunit kattunneqarnerat nalilersornialerpaa, kommunersuarni sisamani borgmesterinik Ilulissani aggustip 4-5-anni 2014 ataatsimeeqateqarnermigut. Ataatsimiinnissamut nunap iluani pissutsinut naalakkersuisup qallunaat aningaasanut nunamilu namminermi pissutsinut ministeriat Margrethe Vestager qaaqqusimavaa, tannalu Danmarkimi kommunit kattunnerannit misilittakkaminik saqqummiussissaaq.
Vittus Qujaukitsoq 2013-imi naalakkersuisunngoramili nalilersorujussusimavaa kommunit kattunnerisa kingorna suut ingerlalluarsimanersut suullu ingerlanerlussimanersut.
– Siullersaatilugu oqaluuserissavarput naliliilluni sulineq sunik imaqassanersoq sammisallu suut nalilerneqassanersut, Vittus Qujaukitsoq oqarpoq.
Kommunit aaqqissuuteqqinneqarput pisortat ingerlatsinerat pisariillisraniarlugu kommuninik nukittunerusunik pilersitsiniarluni, aammalu innuttaasut pillugit aalajangiinerit ammanerusumik pisaleqqullugit. Tamatuma saniatigut innuttaasut qanimut oqartussaaqataanerat qulakkeerniarlugu innuttaasunillu sullissineq pitsaanerulersinniarlugu Vittus Qujaukitsup paaserusuppaa kattussineq naatsorsuutigineqartutut ingerlasimanersoq.
– Tassa immikkoortut pingasut isumaqarfigisakka oqaluuserissagivut, namminersorlutik oqartussat kommunillu akornanni suliassat nappatassallu agguataarnissaat oqaloqatigiissutigitinnagit. Tamatuma kingorna kommunit angissusaat, naatsorsuutigaaralu tamanna aatsaat aappaagu oqaluuserilissagipput.
Vittus Qujaukitsup naatsorsuutigaa nalilersuineq ukiunik marlunnik sivisussuseqassasoq. Sulinissamut tunngaviuvoq annertunerusumik misissuisimaneq, ingerlatsiviup BDO-p Naalakkersuisut sinnerlugit ingerlassimasaa.