Narsaq
Supputaasartartut Narsami naapisimaartut
Kujataani supputaasartartut 14-it Narsami naapisimaaqatigiipput nipilersornermik nuannarinninnertik aallunniarlugu
Kujataani supputaasartartut aappassaa naapisimaaqatigiipput, siorna siullermeersumik naapisimaaqatigiikkamik Qaqortumi naapisimaarsimallutik.
Narsami naapisimaaqatigiinnermik aaqqissuussisoq Benjamin Kielsen oqaluttuarpoq supputaasartartut 14-it peqataasut.
Qaqortumit arfinillit, Narsamit pingasut, Nanortalimmit ataaseq, Eqaqugaarsunnit ataaseq Alluitsumillu ataaseq. Tamakkua saniatigut savaatilik bussinillu ingerlatsisartoq.
Tusarnaartitsipput
Arfininngormat unnukkut katersortarfimmi akunnerni marlunni tusarnaartitsipput, tamatumalu kingorna tamanut ammasumik qittattoqarpoq.
Arfininngormat ullup qeqqa qaangereeraa supputaasartartut atuarfimmi Piareersarfimmi sungiusarput, illup iluani silataanilu, ualikkullu supputaasartartut utoqqaat illuanni aliikkuersuipput.
Tamanna utoqqarnit nuannarineqarluarpoq, ilaat qittaserlutik allallu kørestolertut akuttoqatigiissaartumik natermut tukkarlutik.
Benjamin Kielsenip oqaatigaa naapisimaaqatigiinneq Nunafondenimit Kommune Kujallermillu tapiiffigineqarsimasoq.