Imigassaq
Sunngiffimmi sammisassaqartitsinerit imertarunnaartitsisut
Ukioq manna sapaatip akunnera 18 imigassamik atornerluinermik pinaveersaartitsiffiusartoq sunngiffimmi sammisassanut tunngatinneqassaaq. Nuna tamakkerlugu sumiiffiit 38-it sammisassaqartitsissapput.
Inuusuttut sunngiffimminni susassaqartinneqarpata imigassamik, tupamik aanngaajaarniutinillu allanik atuinissaat pinaveersaartinneqassaaq.
Islandimiit misilittakkat takutippaat, Peqqissutsimut Naalakkersuisoqarfimmiit tusagassiutinut nalunaarummi allassimavoq.
Tamanna tunuliaqutaralugu ukioq manna sapaatip akunnera 18-mi pinaveersaartitsineq angajoqqaat meeqqamik sunngiffimminni sulerisarnerannik tapersersuisarnissaat oqariartuutigineqarpoq. Imalu qulequtserneqarsimavoq 'Peqataagit'.
- Inersimasuusugut meeqqat inuusuttullu peqqinnartumik tupatorfiunngitsumik, imigassartaqanngitsumik allanillu aanngajaarniutinik atuiffiunngitsumik inuuneqarnissaannik tapersersornissaat akisussaaffigaarput. Inuusuttut peqatiginerisigut kiisalu peqqinnartumik inuuneqarnissaannut tapersersersornerisigut taamaaliorsinnaavugut, peqqissutsimut naalakkersuisoq, Agathe Fontain (IA) tusagassiutinut nalunaarummi allappoq.
Sapaatip akunnerani 18-imi aaqqissuussat illoqarfinni aqqanilinni nunaqarfinnilu 27-ini naalakkersuisoqarfimmit tapersersorneqarput.