Pinngortitami ajunaarnersuaq
Sunngiffimmi pinialuttartut Nuugaatsiameersut umiatsiaaqqanik tunissuteqarfigineqarput
Qallunaat aningaasaateqarfiata sunngiffimmi pinialuttartut ajunaarsersuarmi eqqugaasut piniutissanik nutaanikpissarsinissaannut qulakkeerinnipput
Sapaatip-akunnerata siuliani sunngiffimmi pinialuttartut sisamat Nuugaatsiameersut angallatinik aalisariutinik, umiatsiaaqqanik kiisalu piniarnermut aalisarnermullu atortussanik, katillugit 1 million koruuninik nalilinnik tunissuteqarfigineqarput.
Tunissutigineqartut qallunaat aningaasaateqarfianiit KrogagerFonden-imiit tunissutigineqarput. Aningaasaateqarfik atortussanik tunisinermigut Røde Korsimit ilitsersorneqarluni ikiorneqarsimavoq, Pisiffik tusagassiuutinut nalunaarummi paasissutissiivoq.
Sunngiffimmi pinialuttartut taarsiivigineqanngitsut
Sunngiffimmi pinialuttartut sisamaasut Nuugaatsiami junimi tassaarsuaqarnerata kingorna taarsiivigineqartussanut ilaannginneri pisup kingunilaaginnaa nalunaarutigineqarpoq, tassani inuutissarsiutigalugu piniartut aalisartut kisimik atortunik annaasaminnik taarsiiffigineqartussatut nalunaarutigineqarmat.
- Piniartunit allaniit piniutiminnik annaasaqartunit inuit sisamat taakkutuulli annaasaqarsimasut minnerusumik isumagineqarnerat paasinarsimmat KrogagerFonden-imiit pisussaannartut isigisimavarput kikkut tamarmik assigiimmik pineqarnissaat isumagissallugu, aningaasaateqarfik erseqqissaavoq.
Nukinginnarluinnartoq
Tunissuteqarneq aningaasaateqarfimmut pingaaruteqarluinnarsimavoq.
- Nunani allani siornatigut navianartorsiorfiusuni ajunaarnersuaqarfiusuni ikiuuttarsimavugut, immikkulli uani naalagaaffeqatigiinnerup iluani inunnut ajornartoorluinnartunut qanimut ikiuunnissarput nukinginnarluinnartut isigisimavarput, Rune Knude KrogagerFonden-imi siulersuini siulittaasoq, oqarpoq.
Suleqatigiit arlallit
KrogagerFonden-imiit tunissutigineqartut 1 mio atorluarniarlugit suleqatigiit ikiuussimapput allatigut aningaasartuutit annikinnerpaaffissaat anguniarlugu. Ikiorsiissutit assartorneqarnissaat iluatsinnissaannut ikiuuttoqarpoq, Pisiffiup ilaatigut aningaasaleqataaffigaa ataqatigiissaarineq, Siriusimiit immikkut ittumik piumasaqaateqartoqarnera malillugu tunniussisimavoq aammalu Royal Artic Line aningaasaliisimavoq assartugassat Aalborg-imiit Uummannap tungaanut assartuineq akeqanngitsumik ingerlassimallugu. Uummannami sullivik Angalasoq piareersaanernik ikiuussimavoq.
Ilaqutariinnut sisamanut pigisaminnik tamanik annaasaqartunut ikiuisinnaaneq Pisiffiup naammangisimaarluinnarpaa.
Ingerlatseqqilernisamut pingaarutilik
- Piniartutut imaluunniit sunngiffimmi pinialuttartutut nunaqarfimmi inuugaanni nunap pissarititai isumalluutigilluinnarneqartarput, tassaammatami pissaqarniarnermut pingaaruteqarluinnartut. Atortorisanik annaasaqarneq, angallamik, umiatsiaaqqamik annaasaqarneq annertuumik ajunaarfiuvoq. Taamaattumik matumani tunissuteqarneq ulluinnaat ingerlateqqilernissaannut annertuumik pingaaruteqarpoq, taamak oqaaseqarpoq Lena Lauridsen Pisiffimmi CSR-imi akisussaasuusoq.
Pinngortitami ajunaarnersuaq juunip qaammataani pisoq pillugu allaaserisat uani atuakkit.