Island Games

Sungiusaasup dommeri isornartorsiorpaa

Angutit arsaalluni nunanut allanut unammisartut sungiusaasuisa Tekle Ghebrelul-ip Menorca-mut unamminermi dommeri naammaginngilluinnarpaa

Angutit arsaattartut nunanut allanut unammisartut sungiusaasuat Tekle Ghebrelul

Sermitsiaq.AG-p allaaserisaatut kalaallit angutit arsaattartut Menorca-mut unamminerminni 2-2-mik angusaqarput.

Unammineq tamaviaarfiusorujussuuvoq unamminerullu ingerlanerani unammineq unitseqattaarneqartorujussuuvoq.

Kalaallit Nunaanni nunanut allanut unammisartut sungiusaasuat Tekle Ghebrelul isumaqarpoq unammineq sakkortuvallaarsimasoq.

– Dommerip unammineq aqussinnaajunnaarpaa. Tamanna uggornartorujussuuvoq. Unammisartullu tamarmik killissaa qaangerpaat, tamannalu eqqumiitsorujussuuvoq. Ataatsimut isigalugu inernera naammagivallaanngilara, Tekle Ghebrelul Sermitsiaq.AG-mut oqarpoq.

Arsarluarnerusinnaapput

Taannalu oqarpoq unammisartut arsarluarnerusinnaagaluartut.

– Menorca qangatoortorujussuarmik unammeriaaseqarpoq. Menorca-p arsaq qullasissorujussuakkut ingerlanniartarpaa. Tamanna akornutigaarput. Teknikkimik sukkasuumillu arsallaqqikkaluarpugut, Menorca-lli rytme-rput aserorpaa. Unammineq kusanarpallaarsimanngilaq, Tekle Ghebrelul oqarpoq.

Kalallit Nunaata ullumi, ataasinngornermi, Åland unammissavaa.

– Tullianik unammisassatsisut arsaatissaagut. Arsariaaserput aalajangiusimassavarput. Sungiusarsimasatsitut arsaatinngikkaangatta stressertorujussuanngortarpugut, Tekle Ghebrelul oqarpoq.

Powered by Labrador CMS