futsal

Sungiusaasoq: Unammisartut nukittoorujussuit naapippagut

Tjekkiamiunut marloriarluni ajorsarujussuaraluarluni, nunanut allanut unammisartut sungiusaasuata Tjekkiamik suleqateqarneq nuannaarutigeqaa. Tassami kalaallit aasaru Tjekkiamukaqqissapput, taakkulu aamma kingusinnerusukkut Nunatsinnukassallutik

Kalaallit futsalimi nunanut allanut unammisartui, Tjekkiamut ikinngutigiittut unammigamik marloriarlutik ajorsarujussuarput.

Unamminermimi siullermi Kalaallit Nunaat 0-6-imik ajorsarpoq, pingasunngormallu 16-3-eramik ajorsarujussuarlutik.

Artorsartitaasut
Kalaallit Nunaata sungiusaasua, Tekle Ghebrelul, unammisartut marloriarlutik unammiartorlutik Pragimukarnerat nuannaarutigisorujussuuaa.

- Tjekkiami kunngitut pineqarpugut, aaqqissuisuniillu tigulluarneqartorujussuulluta, Tekle Ghebrelul Sermitsiaq.AG-mut oqaluttuarpoq.

Atuaruk: Kalaallit Nunaat futsalimi ajorsarujussuarpoq

- Pragimi unamminitsinni pitsaasunik misilittagaqalerpugut, timimikkullu nukittunerujussuarnut unammivugut. Unammisartugullu periarfissarsiorfigitillutik salloqittagaasaqattaarput. Oqaatigiinnarsinnaavara unamminerni marlunni artorsartitaarujussuarluta, sungiusaasoq nassuiaavoq.

Nunanit tamalaanit takuneqarlutik tusaaneqartut
Taakku ikinngutigiittut unamminerit marluk Kalaallit Nunaannut periarfissanik ammaassissasut, taanna isumaqarpoq.

- Tassami unamminernut taakkununnga marlunnut atatillugu takuneqarlutalu tusaaneqarpugut. Tjekkiamiunullu pitsassuarmik attaveqarlualerpugut, tassami juunimi unammiuaartitsinermut qaaqqoqqereerpaatigut, Tyskland aamma nuna alla tassani qaaqquneqarsimapput, Tekle Ghebrelul oqarpoq.

Taassuma ilanngullugu ilisimatitsissutigaa, Tjekkiamiut oktoberimi Nuummut unammiartussasut.

Atuaruk: Tjekkiap futsalimi Kalaallit Nunaat 6-0-mik ajugaaffigaa

Angerlarlutik sungiusariassapput
Unammisartut maanna Københavnimiipput, aqagulu angerlassallutik. Nunanut allanullu sungiusaasoq oqarpoq, unammisartut angusassamik toraagaqarnerullutik sungiusassasut.

- Neriuppunga timersoqatigiiffiit futsali pimoorullugu aallutissagaat, tassami kalaallit arsartartut ilippanaateqartorujussuupput - nunanut allanut unammisartuinnaanngitsut, Tekle Ghebrelul oqarpoq.

Unammisartunut unamminissarpassuaqarpoq, ilaatigullu aasaru Ruslandimi mini-VM-imut peqataassapput.

Powered by Labrador CMS