Sungiusaasoq tipaatsuttoq: Maanna arsarnivimmik arsartoqarpoq

Aatsaat siullermeerluni ivigaaraasani isikkammik arsarluni Nunatsinni pissartanngorniuttoqarpoq.

Ujaraaqqaniunngitsoq ivikkanut assingunerusumik arsartalertoqarnera, ajunngitsumut sammisumik ingerlasoq, arsartartut nunanut aallanut unammisartut sungiusaasuat, Tekle Ghebrelul oqarpoq.

- Maanna arsarneq ilumoortoq ingerlanneqarpoq. Ujaraaqqani arsartarneq qimakkiartoripput nuannaarutigeqaara, taanna Sermitsiaq.AG-mut oqarpoq.

Atuaruk: Iligiit uku semifinalimut piareerput

Piumassuseqartitsisoq
Arsartunut tamanna iluaqutaaginnassasoq, taassuma erseqqissaatigaa.

- Ivigaaraasani arsartoqartalernera unamisartunut aamma piumassuseqartitsisorujussuuvoq, tamatuma unammisarneq pitsanngoriarteqqissinnaavaa. Eqqarsartariaaseq allanngussammat, Tekle Ghebrelul oqarpoq.

Kisianni arsartut namminneq pitsanngoriassanerlutik aalajangigassaraat, ilanngullugu taanna oqarpoq.

- Unammisartut akornanni sungiusartarnerup pitsaassusaa apeqquterujussuuvoq. Ukioq naallugu sungisartoqartassaaq aamma unammersuarnissaq qaammat ataasiinnarmik sioqqullugu sungiusartarneq taamaatissaaq, angutit sungiusaasuat oqarpoq.

Assit takukkit: Isertitsinerpassuit aamma ajugaaneq aalassatsitsisoq

Tunioraannerit naatsut
Tekle Ghebrelulip aamma neriuutigaa, 'qangatut' arsartoqartarunnaassasoq.

- Iligiit ilaat suli ungasissumut tunioraallutik arsartarput, tamanna qangatut arsarneruvoq. Unammisartut arsaq tigummitillugu eqqissisimasussaapput. Unamminerup ingerlanerani tunioraannerit naatsuussapput. Kisianni siunissami illoqarfiit amerlanerusut ivigaaraasanik arsaattarfeqalerpata iluatsinnissaa isumalluaatigaara, Tekle Ghebrelul oqarpoq.

Pitsaasumik tupaallanneq
Taassuma Nanortalimmiut Siuterumi arsartut unammersuarnermi pitsaasumik tupaallaatigai.

- Unammisartut inuusuttuupput, soqqusaallutik arsarluarusuttorujussuupput. Taamaattorli Kagssassuk pakatsiffigaara (Maniitsumeersut, aaqq.). Anngunniunnermi kusanartumik unammigaluarput, kisianni maanna unamminitik tamarmik ajorsarfigaat. Tamanna naatsorsuutiginngikkaluarpara, Tekle Ghebrelul oqarpoq.

Unammisartut ullumikkut eqqissisimaartinneqarput, aqagulu tallimanngornermi semifinalertoqassaaq.

Assit takukkit: Nuummi GM aallartilluartoq