Royal Greenland
Sumiiffinni arlalinni aalisakkanik tunisassiorneq annertusivoq
Kangaatsiami eqqaanilu nunqarfinni Royal Greenlandip suliffissuani tunitsiviinilu saarullinnik tarajortikkanik qerisunillu tunisassiorneq ingerlalluarsimavoq. Nunaqarfinni Niaqornaarsummi Ikerasaarsummilu tarajortikkanik tunisassiorneq aamma ukioq manna annertusisimavoq
Sumiiffinni arlalinni aalisakkanik tunisassiorneq ingerlalluarpoq.
Tassami immap sikoqannginnera pissutigalugu Royal Greenlandip umiarsuaata assartuutip Kangaatsiami nunaqarfinnilu Ikerasaarsummi Niaqornaarsummilu toqqorsiivimmiittut aallarussinnaasimavai.
Tunisineq ataavartoq
– Taamaattumik ukioq manna ataavartumik tunisassiorsinnaasimavugut. Januaarip aallaqqaataaniit apriilip aallaqqaataanut tarajortikkat saarulliillu qerisut katillugit 348 tonsit tunisassiarisimavagut - siorna piffissami tassani 229 tonsit tunisassiarisimallutigit, Kangaatsiami suliffissuup pisortaa Abia Thorsteinsen Royal Greenlandip nittartagaanut oqarpoq.
Niaqornaarsummi tunitsiviup pisortaa Judithe Wille oqarpoq suliffissuaq, siusinnerusukkut peqqumaasiviup ulikkaarnera pissutigalugu matoqqasarsimasoq, ukioq manna matoqqasimanngitsoq, tassa toqqortaatit januaarimiilli marloriarluni ilanngarterneqartarsimammata.
Tamanna pissutigalugu suliffissuarmi tarajortikkat ullormut 5-6 tonsit tunisassiarineqarsinnaasimapput.
– Taamaattumik aalisaretuvut sulisuvullu 11-t missaanniittut ukioq manna tunisinerup matuneqarneranik eqqorneqarsimanngillat, Judithe Wille oqarpoq.
Piareersarput
Aamma Ikerasaarsummi suliffissuarmi sulisut aalisartullu imaq sikunani ukiorissaarnera iluaqutigisimavaat.
– Sivikitsuararsuarmik imaq sikunikuugaluarpoq, ukiuuneratali annersaani imaq sikoqarsimanngilajq. Taamaattumik nunaqarfimmi aalisartut 20-t missaanniittut qaammatini kingullerni ataavartumik tunisisinnaasimapput taamaasillunilu sulisuvut 15-it missaanniittut ippassaq tikillugu tarajortikkanik tunisassiorsinnaasimapput. Ippassaq tunisineq matusimavarput pissutigalugu suanniarnermut aallartilersumut piareersaratta, Ikerasaarsummi tunitsiviup pisortaa Lars Karlsen oqarpoq.