Piniarneq

Sumiiffiit ilaanni tuttunniarneq sivitsorneqarpoq

Unerisimasannginnera pissutigalugu sumiiffiit ilaanni inuussutissarsiutigalugu tuttunniartarneq sivitsorneqarpoq. Sumi sivitsuisoqanersoq takuuk

Arkivfoto.

Aalisarnermut piniarnermullu naalakkersuisup Karl Kristian Krusep (S) Nuussuarmi, Naternami, Akia-Maniitsumi, Ameralimmi, Qeqertarsuatsiaani, Qassimi kiisalu Neriami inuussutissarsiutigalugu tuttunniarnerup sivitsorneqarnera nalunaarutigaa.

- Piniarfinni pineqartuni ukiuunerani killilimmik tuttunniarneq taamaalillugu 25. februaari ilanngullugu ingerlasussanngorpoq sivitsuinermullu pissutaalluni sinerissami februaarip affaata siulliup ingerlanerani silap unerisimannginnera. Erseqqissaatigineqassaaq sivitsuisoqaqqissanngimmat, Naalakkersuisoqarfianit tusagassiutinut nalunaaruteqartoqarpoq.

Sisimiuni Kangerlussuarmilu sivitsuisoqanngilaq
Nuussuarmi, Naternami, Akia-Maniitsumi, Ameralimmi, Qeqertarsuatsiaani, Qassimi kiisalu Neriami tuttuttassat 100-nik ilaneqarput. Taamaattoq Sisimiut eqqaanni sivitsuisoqarsinnaasimanngilaq. Piniarfimmi tassani martsip aallartilaarneraniit tuttunik umimmannillu kisitsisoqarnissaa sivitsuisoqannginneranut pissutaavoq.

- Tuttut umimmaallu kisitsineq sioqqullugu ulluni 14-ni eqqissisimatinneqarluinnarnissaat pisariaqarpoq kisitsinerup iluatsittumik ingerlanneqarnissaa siunertaralugu, Naalakkersuisoqarfimmit ilisimatitsissutigineqarpoq.

Ukiuunerani inuussutissarsiutigalugu tuttunniarneq februaarip aallaqqaataanit 25-iat ilanngullugu ingerlassaaq.

Powered by Labrador CMS