sumiginnaaneq
Sumiginnaaneq pillugu sulianut aningaasat 3,5 million koruunit atorneqarniartut
Kukkunersiviusarfiup Deloittep ukiuni sisamani tulliuttuni Kommuneqarfik Sermersuumi meeqqanut- ilaqutariinnullu tunngasunik suliaqarnermi ikiortigineqassaaq. Kommunimi annertoorujussuarmik sumiginnaasoqarsimasoq nakkutilliinermut nalunaarusiami aasanngitsiartoq uppernarsarneqarpoq.
Suliassat meeqqanut tunngasut 2.200-t tamarmik misissorneqassapput, peqatigitillugulu suliassaqarfimmit tassani ingerlatsivimmi kukkunersiuissalluni, pitsanngorsaataasussanillu misissuissalluni, tusagassiuutinut nalunaarummi erserpoq, kommunillu nittartakkamini saqqummersissimavaa.
Millionilikkuutaanik akeqartoq
- Suliassaatitta suleriaatsittalu ineriartortinneqarnissaannut pilersaarummi nutaamik isiginnilluni sulisut tamaasa peqataatillugit nalilersuiffigineqarnissaat pingaaruteqarpoq. Suliassatsinnut pikkoriffeqalernissamut iluarsiissutigisassatuarput tassaavoq kukkussutsitta ilikkarfiginissaat, Meeqqanut Ilaqutariinnullu Ingerlatsivimmi pisortaagallartoq, Helene Horsbrugh oqarpoq.
Suliffeqarfiup suliassaasa ilagaat ilinniartitsinertalimmik, suliamik ilisimannittumik aqutsisoqalernissaa. Ikiorneqarnermulli 3,5 million koruunit tikillugit akeqarsinnaavoq.
- Taama iliunngitsoorsinnaanngilagut. Suliassaqarfimmi arlaleriarluni pisariaqartinneqartumik ineriartortitsiniartoqartarsimagaluarpoq, iluatsinngitsumilli. Avataaneersumik suleqateqarnissarput pisariaqartipparput, siunnerfitsinnik eqqortumik aqqutissiuunneqarnissatsinnut ikiuussinnaasumik, taanna oqarpoq.
Deloitte suliassarissavai siunnersuinerinnaq, aammalu suliassatigut isumaginninnermut aqutsinermullu tunngasunut aqqutissiuussinissaq.
Kommuneqarfik Sermersuumi nakkutilliinermut nalunaarusiaq pillugu allaaserisat tamaasa atuakkit.