Sume pillugu piviusulersaarusiaq illoqarfinni assigiinngitsuni takutinneqassaaq

Piviusulersaarusiaq nuannarineqarluartoq 'Sume - mumisitsinerup nipaa' Qeqertarsuup Tunuani illoqarfinni kujataanilu takutinneqassaaq.

Piviusulersaarusiamut suliarinnittut Inuk Silis Høegh Emile Hertiling Péronardilu nalunaaruteqarput. Piviusulersaarusiaq Nuummi Katuami pingasunngornermi septembarip qulingani takutinneqaqqaarpoq.

Taannalu Aasianni, Kangaatsiami, Qeqertarsuarmi, Qasigiannguani, Uummannami, Qaqortumi Narsamilu takutinneqartussanngorpoq. Aasianni septembarip 25-ani takutinneqassaaq, Narsamilu naggataagut oktobarip arferngani takutinneqassalluni.

Piviusulersaarusiap Nuummi, Sisimiuni Ilulissanilu takutinneqarnerani isiginnaartarfiit ulikkaaqqasarput.

- Illoqarfinni filmertarfeqanngitsuni piviusulersaarutip takutinneqarnissaa neriuutigisuaannarnikuuarput. Takutinneqarnissaanut angalanissaq sivitsorpoq. Pilersaarusiorneq naatsorsuutigineqartumit sivisunerugaluartoq iluatsippoq, Inuk Silis Høegh Emile Hertling Péronardilu tusagassiutinut nalunaaruteqarput.

Illoqarfinnut aamma allanut takutinneqarnissaa kingusinnerusukkut sulissutigineqarumaartoq oqaatigaat.

Piviusulersaarusiap takutinneqarnissaanut pilersaarutit Facebookimi quppernerani saqqummiunneqassaaq.