Sume-kunnik filmiliaq
Sume pillugu filmiliaq Berlinimi filmfestivalimi ilaatinneqalerpoq
Sume pillugu piviusulersaarusiaq ‘Sume - mumisitsinerup nipaa' Europami silarsuullu sinnerani filmfestivalit pingaarnersaanni, Berlinimi nunat tamalaat filmfestivalianni, aamma taaneqartartumi Berlinale, ilaasussanngorpoq
Nunat tamalaat filmfestivaliani ImagineNative Torontomi marloriarluni oktobarimi akissarsitinneqareerluni, Sume pillugu piviusulersaarusiaq nunat tamalaat akornanni saqqumilaartussanngoqqippoq.
Sumemi pillugu piviusulersaarusiaq ‘Sume - mumisitsinerup nipaa' filmfestivalit akimanersaasa ilaannut, Berlinalemut ilaasussanngortinneqarpoq. Berlinalemi isiginnaartartut silarsuarmi filmfestivaleqartarnermi amerlanerpaasarput.
Aatsaat siullermeerluni kalaallit filmiliaannik Tysklandimi illoqarfiit pingaarnersaanni Berlinimi festivalilertoqarnissaani, maannalu 65.-issaanik ingerlanneqartussami, peqataatitaqartoqartussanngorpoq.
- Suleqatikka sinnerlugit nuannaarpunga. Sumep nipilersuutai taallaalu asseqanngillat, allanneqarsimallutillu oqaatsinik ikittuinnarnit paasineqarsinnaasuni. Silarsuullu sinnera isigalugu kalaallit kulturiat mikisoralaajuvoq. Taamaammat tulluusimaarutigissaqaara Nunatta oqaluttuarisaanera nutaajunerusoq nunat tamalaaneersunut takusassiarisinnaagutsigu, Inuk Silis Høegh Sume pillugu piviusulersaarusiami ilitsersuisoq taama oqarpoq.
- Nipilersoqatigiit Sume saamerliunerusut Østberlinimi 1975-imi musikfestivalertitsimmata ilaapput, taamaattumik ukiut 40-t qaangiunnerani illoqarfimmi tassanerpiaq Sume pillugu filmiliaq takutittussanngoratsigu arlaatigut oqaluttuarisaanermut ilaavoq. Berlinimi takutinneqarnissaanut toqqarneqarneq Sume pillugu filmiliamut periarfissatsialaavoq, kisianni aamma neriuutigaarput filmi iluaqutigalugu kalaallit filmiliortarnerannut, ukiuni makkunani ineriartupiloortumut, nunat tamalaat ukkatarinninnerulersinnaanerat, Emile Hertling Péronard, filmilioqataasoq taama oqarpoq.
Sume pillugu piviusulersaarusiaq ‘Sume - mumisitsinerup nipaa’ festivalip Panorama-programmiani peqataassaaq, tassani silarsuarmi tamarmi nutaaliorlutik filmiliortartut takusassiarineqasssapput.
Filmi Berlinimi februaarip arfineq aappaani takuneqarsinnaalissaq, kisianni pisortatigoortumik marlunngornermi februaarip qulingani Sony CineStar-biografimi takutinneqassaaq. Festivaleqarnerup nalaani DR Salesip filmip nunani allani tv-kkut takusassiarineqarsinnaaneranut iluatsitseriarniarpoq.
‘Sume - mumisitsinerup nipaa’pillugu allaaserisat tamaasa uani atuakkit