mumisitsinerup nipaa

Sume pillugu filmi Nunavumi takutinneqassaaq

Piviusulersaarusiaq 'Sume - mumisitsinerup nipaa' Nunavumi takutinneqaqqaassaaq sapaatip akunnerata matumani

Nipilersoqatigiit Sume - assi toqqorsivimmit

'Sume - mumisitsinerup nipaa' Nunavumi takutinneqaqqaartussanngorpoq sapaatip akunnerata matumani.

Oqaatsit pillugit ataatsimeersuartoqarnerani 'Inuugatta' Iqalunni piviusulersaarusiami ilisitsersuisuusoq Inuk Silis-Høegh peqataassaaq. Ataatsimeersuarneq Iqalunni ingerlanneqassaaq marlunngornermit. Nunavut illoqarfiisa pingaarnersaanni piviusulersaarusiaq takutinneqassaaq.

- Inoqqaariit inuinut piviusulersaarusiap takutinneqarnissaa sulissutigereerlugu piviusunngorpoq. Oqaluttuarisaanikkut kulturikkullu assigiissuteqartorujusssuvugut. Canadap avannaani nipilersoqatigiit Sume soqutigineqarluartuusut ilisimatinneqarpugut. Taamaammat oqaatsit pillugit ataatsimeersuartoqarnerani piviusulersaarusiap takutinneqarnissaa tulluarpoq, tusagassiuutinut nalunaarummi Inuk Silis Høegh oqarpoq.

Oqaatsitta qanoq tusagassiuutitigut eqqumiitsuliornikkullu saqqumilaartinneqarsinnaanersut pillugit paasititsiniianermi Inuk Silis Høegh peqataassaaq. Eqqumiitsuliortut Laakaluk Williamson-Bathory aamma Becky Kilabuk peqatigalugit saqqummiissapput. Piviusulersaarusiami peqataasoq tusagassiortoq Tida Ravn oqaluttuassaaq qanoq Sumep nipilersuutai sunniuteqarsimanersut.

Inuksuk High Schoolimi Iqalunni piviusulersaarusiaq aqagu marlunngornermi takutinneqassaaq.

Piviusulersaarusiaq takutinneqaqqaarpoq septembarip aqqaneq aappaani 2014-mi.

Powered by Labrador CMS