Sume-kunnik filmiliaq
Sume-kunnik filmiliaq canadami filmfestivalimut toqqarneqarpoq
SUMÈ - THE SOUND OF A REVOLUTION ImagineNative Film and Media Arts Festival 2014-imi Best Documentary-tut aamma Best Indigenious Language Film-itut nersornaasigassatut piukkunneqarpoq
Nuummi takuteqqaarneqarneranit qaammatit aappaata affaa qaangiutiinnartoq SUME - MUMISITSINERUP NIPAA nunani tamalaani soqutigineqalereerpoq.
Filmi - nunani tamalaani taaguutilik SUMÈ - THE SOUND OF AF REVOLUTION - nunat inuiinik samminnilluni filmfestivalit nunarsuarmi annersaasa ilaanni: ImagineNative-mi, ukioq manna 15-issaa canadami illoqarfissuarmi Toronto-mi ingerlanneqartussami, peqataasussatut toqqagaavoq. Taamatut tusagassiorfinnut nalunaarutikkut paasissutissiivoq filmimi produceri Emile Hertling Perónard.
– Filmip Kalaallit Nunaanni tupinnaannartumik nuannarineqarnersuata kingorbna soorunami qisuariaatissat pissanngatigaagut, filmi nunani allani takutinneqarpat. Anguniagariuaannarsimavarput Kalaallit Nunaat pillugu Kalaallit Nunaannut filmiliussalluta. Sume-kunnilli oqaluttuaq aamma nunarsuarmut tunngasstitaqarpoq, tassa aamma inuiaqarmat kinaassutsiminnik sorsuutiginnittunik. Isumaqarpunga tamanna amerlanerpaat ilisarisinnaassagaat. Minnerunngitsumik nunat inoqqaavineersut allat Toronto-mi peqataassapput, Emile Hertling Perónard tusagassiorfinnut nalunaarutikkut oqarpoq.
Festivali ukioq manna ingerlanneqassaaq oktobarip 22-annit 26-annut, SUMÈ - THE SOUND OF A REVOLUTION nunani tamalaani takuteqaarneqassaaq oktobarip 26-anni, Toronto-p qeqqani TIFF Bell Lightbox-imi.
Filmip takutinneqarnerni ilitersuisua Inuk Silis Høegh producerialu Emile Hertling Perónard najuutissapput.
Taamaasinerani filmiliortut marluk paasereersimassavaat filmi ataatsimik arlalinnilluunniit nersornaaserneqarnersoq. Tassami nersornaatit arfininngornermi oktobarip 25-anni tunniunneqariissapput.