Sulorartartut tamangajammik semifinalemut piareertut

Arctic Winter Gamesimi ataasinngornermi ataasiakkaarluni unamminerit ingerlanneqarput.

Kalaallit unammisartut unamminerni siullerni ajunngivissumi ingerlapput, unammisartut arfineq-marluk semifinalenut piareerput, taakku sisamanngorpat ingerlanneqassapput.

Semifinalenut piareertut
Akullerni ataasiakkaarluni unamminerni pissartanngortussatut ilimagineqartoq, Nuka Mark Nielsen, ataasinngornermi assoroortitaavallaanngilaq. Unamminini pingasut immikkoortuni marlunni ajugaaffigai. Taassuma Sappa Johnny Cookie Nunavumeeersoq semifinalemi unammissavaa.

Tassani ukioqatigiiaani Toke Ketwa-Dreifer Nunatsinneersoq aamma semifinalemut piareerpoq, taassuma Simon Jean Alberta Northimeersoq unammissavaa.

Atuaruk: Sulorartartut ilimagineqarnertik naammassiniarsariniarpaat

Niviarsiaqqani ajullerni Cecialia Josefsen aamma semifinalessaaq, aamma Milka Brønlund taamatut. Siulliup Eilish Quan unammissavaa, Milka Brønlundip Mina Anna Opik unammissallugu.

Taamaattumillu kalaaliinnaat akornanni pissartanngorniutivinnissamut suli periarfissaqarpoq.

Tamangajammik
Nukarlerni Angutivik Berthelsen aamma semifinalemut nukappiaqqani piareerpoq. Tassani Aaron Quan Alberta Northimeersoq unammissavaa, taassuma Victor Langholz Nunatsinneersoq kvartfinalinukartippaa.

Niviarsiaqqani nukarlerni Pilunnguaq Hegelund aamma Miinannguaq Søholm Petersen maannamut suli kukkuneqaratik ingerlasimapput. Marluullutik sisamanngorpat semifinalernissaminnut piareerput.

Marlunngorneq pingasunngornerlu marlukkaarneq aamma akulerulluni marlukkaarneq Arctic Winter Gamesimi sulorarnermi ingerlanneqassapput. Unamminerit tamarmik Inussivimmi ingerlanneqarput.