Sulorartartut makitsinerloqisut

Kalaallit sulorarnermi nunanut allanut unammisartut holdikkaarluni unamminissamut makitsilluarnissaq pisariaqartissimavaat, holdi Island Gamesimi, Den Engelske Kanal-imi qeqertami Jersey-mi ingerlanneqartumi, medaljenanniassaganik.

Holdili takorloorneqarsinnaasumit ajornerpaamik makitsipput, tassa holdikkaarluni unamminerit aappassaanni Kalaallit Nunaata ajugaasussatut ilimagineqartut unammissammagit.

– Kingullermik Bermudami inissinnerput pissutigalugu seed-erneqanngilagut. Unamminerup aappaani unammeriissavagut Jersey-meersut sukalasuut, siusinnerusukkut Tuluit Nunaanni nunanut allanut unammisartuusimasunik unammisarrtullit. Tamanna uggornaqaaq, tassami pappialakkut holdit kakkannerit pingasut akornanniikkaluaratta. Taamaattumik ingerlaqqinnissaq ajornakusuussaaq, nunanut allanut unammisartut sungiusaasuat Rune Svenningsen Sermitsiaq.AG-mut oqaluttuarpoq.

Unamminermi siullermi Kalaallit Nunaata Falklandsøerne unammissavaat, gruppimilu unamminerup aappaani tassa Jersey unammissallugu. Gruppimi ajugaasut semifinalimut ingerlaqqissapput.

Angusarissaarsinnaapput

Rune Svenningsenili isumaqarpoq ataasiakkaarluni unammiuaarnermi kalaallit medalje-nannissaminnut periarfissarissaartut.

– Ataasiakkaarluni unammiuaarnermi tamaviaarnassaqaaq, angusarissaarsinnaavugulli. Medalje-nassinnaalluta upperaara, nunanut allanut unammisartut sungiusaasuat oqarpoq.

Sulorarluni unammiuaarnermi Kalaallit Nunaannit angutit tallimat arnallu tallimat peqataassapput. Rune Svenningsenilu oqarpoq Bror Madsen aamma Jens-Frederik Nielsen angusarissaarnissaminnut periarfissarissaartut.

– Arnani Sara Lindskov Jacobsen unammiuaarnermi angusarissaarsinnaavoq, Danmarkimi najugaqarami Hvidovre-milu sungiusartartorujussuulluni. Allanilli aamma unammisartoqarpugut GM-imi medalje-nassimasunik, taamaattumik unammisartutoqqanik taamatut pissartanngorniunnermi peqataareersimasunik unammisartunillu inuusuttunik unammisartoqarpugut pimoorussisunik sungiusarluartartunillu, Rune Svenningsen oqaluttuarpoq.

Sulorartartut unammiuaarneq aallarnerlugu holdikkaarlutik unammissapput, tamannalu sapaatiuppat aallartissaaq, ataasiakkaarlunilu unammiuaarneq marlunngorpat aallartissaaq.