Sulorartartut Danmarkimi sungiusarlutik tammaarsimaartut

Sapaatip-akunneq kingullermi sulorartartut nunanut allanut unammisartut Aarhusimi sungiusariarlutik tammaarsimaarput, tassanilu aamma najugallit sulorartartut weekendimi unammivaat.

Aappaagu Island Gamesertoqarnissaanut, Gotlandimi Sverigep eqqaaniittumi pisussamut taakku piareersarput.

Tassani unammisartut 13-it peqataapput, Nunatsinneersut qulingiluat, efterskolertut sisamat Danmarkimiittut.

Atuaruk: Michael Kleist sulorartartut kattuffianni siulittaasutut qinigaaqqittoq

Ineriartorneq pitsaasoq
Nunanut allanut unammisartunut sungiusaasup Rune Svenningsenip sulorartartut naammagisimaarluarpai.

- Unammisartut pitsanngoriarluarsimasut takuneqarsinnaavoq. Sungiusarluta tammaarsimaarnitsinni sungiusarpugut, oqaloqatigiippugut aamma Aarhusimeersunut unammivugut, taanna Sermitsiaq.AG-mut oqarpoq.

Kalaallit Nunaata kingullermik Island Gamesertoqarnerani sulorarneq ujaminnaffituaraa, tassani Bror Madsen aamma Jens-Frederik Nielsen marlukkaarnerminni kuultinnapput.

Atuaruk: Frederik Elsner pingasoriaammik Nunatsinni sulorarluni pissartanngorpoq

Ujaminnanniartut
Tulliani Island Gamesertoqarnissaanut unammisartut qassinik ujaminnanniarsarissanersut, Rune Svenningsenip maanna oqaatigisinnaanngikkallarpaa.

- Ujaminnattassat amerlanerpaat pissarsiarisinnaasagut soorunami anguniarsarissavagut. Unammisassagut suli ilisimannginnatsigit, qanoq anguniagaqarnissarput suli oqaatigiuminaappoq.

- Kisianni unammisartut ataasiakkaarlugit qanoq pitsanngoriarsinnaanersut oqaloqatigaagut. Tassanilu Island Games aallartippat timikkut pitsaanerpaaffissartik angoreersimassagaat pingaarnerpaavoq, Rune Svenningsen erseqqissaavoq.

Unammilleqatigiinneq sakkortooq
Sulorartartut weekendimi unamminerminni sakkortuumik unammisaqarput. Sara Lindskov Jacobsen angusarissaarnerpaavoq, taassuma kvartfinale anguaa.

Unammisartut sungiusartut takoreernerisa kingorna, kikkut Island Gamesimut peqataassanersut, nunanut allanut sungiusaasup suli aalajangiutinngilaa.

- Island Gamesimut peqataasussanik toqqaaniarnermi inissat unammissutigineqarput. Inuusuttut unammisartut nutaat takkussuunnikuupput, Frederik Elsnerilu unammisaleqqinnikuuvoq, Rune Svenningsen oqarpoq.

Island Gamesertoqalerpat sulorartartut arfineq-pingasut qulillu akornanni amerlassusillit peqataassapput.

Assit takukkit: Badmintornertartut kuultinnannerat