Island Games
Sulorarnermik piginnaanilik
Sulorartartoq inuusuttoq Iidui Broberg Island Games sioqqullugit sisamariaannarluni sungiusarsimavoq
21-nik ukiulik IIdui Broberg, Qeqertarsuarmiu, aappassaa Island Gamesinut peqataavoq.
Taanna oqaluttuarpoq Island Games, ukioq manna Jersey-mi ingerlanneqartut, sioqqullugit sungiusarpallaarsimanani.
– Qeqertarsuarmi sulorartartoqarpiannginnami sungiusarnissaq ajornakusoorsimavoq, Iidui Broberg Sermitsiaq.AG-mut oqarpoq.
Taannalu illoqarfimmi angerlarsimaffimmini sulorarpallaartanngikkaluarluni kingullermik Nunatsinni pissartanngorniuttoqarmat angusarissaartorujussuuvoq.
Taamanikkut Iidui Broberg kisimiilluni, aammalu arnat angutillu iligiiaarlutik, unammiuaarnermi sølvinnappoq, iligiiaarlunilu double-mi pissartanngorluni.
– Neriuppunga arnat angutillu iligiiaarneranni unammisaqatigisaralu Karl-Jakob Thomassenilu Island Gamesmi matumani angusarissaassalluta. Kisimiilluni unammiuaarnermut isumalluarpallaanngilanga, angusarissaarnissannut naammattumik sungiusarsimannginnama, Iidui Broberg oqaluttuarpoq.
Arpanneq arsaannerlu
Qeqertarsuarmi sulorarnermik sungiusarnermut taarsiullugu Iidui Brobergip timigissaatigisarsimavaa arsaanneq.
– Island Games sioqqullugit sulorarnermik sisamariaannarlunga sungiusarsimavunga. Danmarkimi sungiusaqatigiinnermi ajornakusoortitsisimavunga, tassa sulorarnermi nukiit allat atorneqartarmata. Isumaqarungali sungiusarneq iluaqutaalluartoq, tassa sungiusaasutta ikiorluartorujussuugaminga. Soorunami piumsaqarfigaatigut, takusinnaagaangamiulli killissarput tikikkipput unitsittarpaatigut, Iidui Broberg oqarpoq.
Nunanut allanut unammisartunut toqqarneqarnissani naatsorsuutigisimanngikkaluarpaa.
– Tapersersorneqarluarsimavunga, taamaattumik peqataaniarlunga aalajangerpunga. Piffissami aggersumi sulorarnerusalissaanga, tassa ilinniariarlunga Nuummut nuussagunarama, tassanilu akulikinnerusumik sungiusartassaanga, Iidui Broberg oqarpoq.