Sulorarneq: Jens-Frederik Nielsen ukiut tulleriisillugit pingasoriaammik pissartanngorpoq

Sulorartartoq Jens-Frederik Nielsen B-67-minngaanneersoq ukiup aappassaanik pissartanngorniutivittoqarnerani pingasoriaammik pissartanngorpoq.

Ilulissani GM, arfininngornermi pissartanngorniutivinnerit ingerlanneqarnerini, taanna, angutit ataasiakkaarnerini, iligiiaarnerini aammalu akulerullutik iligiiaarnerini kuultinnappoq.

Jens-Frederik Nielsenip Sermitsiaq.AG-mut oqaatigaa, pingasoriaammik pissartanngornissani naatsorsuutigisimanagu.

Qasujaatsoq

- Ukioq manna unammisartut arlallit pikkorissut peqataapput, uangali unammilluarpunga qasujaallungalu. Taamaammat pingasoriaammik pissartanngoqqilluni nuanneqaaq, taanna oqarpoq.

Taassuma angutit ataasiakkaarlutik pissartanngorniutivinnerini Frederik Elsner ajugaaffigaa. Angutit iligiiaarnerini taanna iligalugu, Taatsi Pedersen aamma Bror Madsen ajugaaffigaat, akulerullunilu iligiiaarnermi Malu P. Degn iligalugu Frederik Elsner aamma Iidui Broberg pissartanngorniutivinnermi ajugaaffigaat.

Nunani allani amerlanernik unammisarnissamik neriuttoq

- Timersuut assut aallussimavara, ukiunilu kingullerni marlunni sakkortuumik sungiusarsimallunga. Isumaqarpunga assut ineriartorsimallunga, ingammik iligiit EM-ernissaannut sakkortuumik sungiusarnikuugama, taanna erseqqissaavoq.

Taamaammat nunanut allanut unammisartoqatinilu nunanut allamut angalallutik amerlanerusunik unammisalernissartik neriuutigaa.

- Unammiartorsimatilluta assut ineriartuutigisarparput, taamaammat ingerlaqqissagutta nunat tamalaat akornanni unamminerit amerlanerit pisariaqartippagut. Tassani timersuut, inuusuttunut siunissami unammersuarnernut peqataarusuttunut, soqutiginarsarsinnaavarput, Jens-Frederik Nielsen ukiup tulliani GM-imi pingasoriaammik pissartanngoqqikkusuttoq, oqarpoq.