Nuuk
Sulluliarsuup sammivia ataasiinnarmut ingerlaarfiunngiinnassaaq
Innuttaasorpassuit aalajangiinermut qisuariarsimapput
Marlunngormat politiinit tusagassiuutitigut nalunaarutigineqarpoq, angallatinut puttasoqarfiup eqqaata angallaffiunerata isumannaatsuunissaa anguniarlugu, Nuummi Iggiaanit sulluliarsuaq illoqarfiup tungaannaanut aqqutigineqartalissasoq.
Atuaruk: Nuussuarmi Sullorsuaq sammivimmit ataasiinnarmit aqqutaalissaaq
Tamatumalu kinguneranik illoqarfimmi angallateruttulerfinnut kingunerisassai ernummatigalugit innuttaasunit arlalinnit qisuariarfigineqarmat, taamatut aalajangerneq politiinit kommunimillu allanngortinneqarnissaa isumaliutigineqalerpoq.
Artukkiinnginnerusumik
- Isumaqatigiissutigisarput tassaavoq, sulluliarsuup eqqaani angallanneq isumannaannerusoq anguniarlugu iliuuseqartariaqartugut, pisariaqanngitsumilli artukkiinata taamaaliornissarput isumaliutigaarput, Kommuneqarfik Sermersuumi ingerlatsinermut pisortaq, Frank Rasmussen, oqarpoq.
Nalunaarutigeqqaarneqarnerasut sulluliarsuaq ataasinngorpat sammivia ataasiinnarmut ingerlaarfiulissanngilaq. Isumannaallisaasoqarnissaali anguniarlugu, sulluliarsuarmi allanik angallattoqarnera biilertartunit takulluarsinnaanngoqqullugit iliuuseqartoqarnissaa imaluunniit qaammaqquteqarnerunissaa Kommuneqarfik Sermersuumit isumaliutigineqarpoq.