inuussutissarsiorneq
Sullivinnik Nakkutilliisoqarfik akisussaaffigilerniaraat
Sullivinnik nakkutilliisoqarnermik akisussaaffimmik tigusinermi suliffeqarfiit tamarmik akiliissapput, Naalakkersuisut siunnersuuteqarput
Inuussutissarsiornermut, Suliffeqarnermut Niuernermullu Naalakkersuisoqarfiup nassuiaammi nutaami nassuiarneqarpoq, Nunarput qanoq ililluni namminersortumik, Danmarkimut atajunnaarluni Sullivinnik Nakkutilliisoqalersinnaanersoq.
Nassuiaat naapertorlugu, sullivinni isumannaallisaanermut inatsit, tamatuminngalu angerlartitsineq Inatsisartuni aappaagu 2017-imi upernaakkut suliarineqarumaartut. Pilersaarut naapertorlugu suliamik tigusivinnissaq 2018-imi pissaaq.
Akileeriaasissaq
Nerisassanik nakkutiginninnermut assingusumik akileeriaaseqartoqarnissaanik, Naalakkersuisut siunnersuuteqarput: Suliffeqaarfiit pulaarneqarnitik tamaasa akilertassavaat.
Radioaviisip tamanna oqaluttuaraa.
KNR-imi atuaruk: Sullivinni avatangiisinik isumannaallisaaneq suliffeqarfiit akilissagaat
Sullivinni avatangiisit akisussaaffigilerneqarnissaannut isumassarsiaq, Sulisitsunit nuannarineqarpallaanngilaq.
Ullumikkut: Naalagaaffimmit akeqanngitsumik isumagineqartoq
- Inuussutissarsiummik ingerlatsisut ullumikkut akeqanngitsumik pisartagaannut nutaamik aningaasartuuteqalernissaq isumassarsiatsialaanngitsoq isumaqarpugut, Nunatsinni Sulisitsisut allaffeqarfimmi pisortaa, Karsten Klausen KNR-imut oqarpoq.
Ullumikkut naalagaaffik Nunatsinni sullivinni avatangiisinik akiliisuullunilu nakkutilliisuuvoq, suliffeqarfinnilu sulisut ilinniartittarpaat pitsaanerusumik suliffeqarfiit avatangiiseqartinnissaat ukkataritillugit.