sullivinni avatangiisit
Sullivinni avatangiisinut akisussaaffiup tiguneqarnissaa ernumassutigineqartoq
Sullivinni avatangiisinut akisussaaffiup tiguneqarnissaanut Sulisitsisut Naalakkersuisunut aarlerisaaripput.
- Sulliviit avatangiisiinut tunngasut teknik-ikkut inatsisitigullu suliarissallugit imaannaanngitsuupput, immikkut ilisimasalinnit, nunatsinni pigineqanngitsunit, isumagineqartariaqartussaasut. Taammaattumik immikkut ilisimasallit avataaniit piniartussaasariaqassavagut Sulisitsisullu Peqatigiiffiannit akunnattuungartoqarteqaarput, aningasartuutissanut illikartitat 1,3 millionit koruuniusut naammassanersut, peqatigiiffik tusagassiuutinut nalunaarummi allappoq.
Sulisitsisut: Ajunngitsumik ingerlavoq
Sulisitsisut tamatumunnga aalajangiiffissatut siunnersuummik saqqummiisoqannginnissaa innersuussutigaat, tamannalu ullumikkut ajunngitsumik ingerlasoq isumaqarput.
Peqatigiiffik SIK tunngaviusumik akisussaaffigilerneqarnissaanut akuersaarpoq, kisianni piumasaqaatit assigiinngitsut malillugit pisariaqarnerarpaa.
SIK: Suliamut piginnaasat qulakkeerneqassapput
- SIK akuersaarpoq. Kisianni akisussaaffimmik tigusinermi suliamut piginnaasat pisariaqartinneqartut qulakkeerneqarnerisigut pissaaq, aammalu tamatumunnga aningaasaliissutit amerlineqartariaqarput, taamaalilluni sullivinni avatangiisinik nakkutilliineq nukittorsarneqarniassammat, Bjarne Petersen SIK-mi allattoqarfimmi pisortaq Sermitsiaq.AG-mut oqarpoq, nangillunilu:
- A oqaatigisimagaanni aamma B oqaatigineqartariaqarpoq, SIK-mi allattoqarfimmi pisortaq oqarpoq, taassuma 1,3 millionit koruunit naammannersut nalilersinnaannginnerarpaa.
Ilinniarnermut aningaasat tunniunneqarlik
Sulisitsisut Peqatigiiffiata aningaasat sullivinni avatangiisit akisussaaffigilernissaanut atorneqartussat pisariaqartinneqartut meeqqat atuarfianut periusissamik pilersaarusiornermut aamma atugarliortut sulilernissaannut atorneqartuugunik pitsaanersussagaluartoq tikkuarpaa.