Greenland Express Air
Sullinneqarnissaminik itigartinneqangajappoq
Greenland Express Air-ip siunissaa nalorninarsiartorpoq, selskabip timmisartuussinissani taamaatiinnaqqippaa, paasisaqarfiit ilisimasaqarluartut oqarput selskabip akiligassani akileruminaatsikkai. Steen Lynge ikiuukkumanngilaq.
Tallimanngormat Greenland Express Airip timmisartuussinissani taamaatiinnaqqippaa, tamannalu peqatigalugu selskabi oqaaseqaateqarpoq ingerlatsinermi annertuunik ajornartorsiuteqarluni. Sermitsiaq.AG-p maanna oqaluttuarisinnaavaa ajornartorsiutit annertoorujussuarmik aningaasaqarniarnermut tunngasuusut, Gert Braskillu naatsorsuutigissanngilaa politikkikkut ikiorneqarnissani.
Piffissaq kingulleq atorlugu akiliivoq
Greenland Express Air kingullermik timmisartuussivoq marlunngormat, taamanikkut Danmarkip, Islandip Nunattalu akornanni siumut utimullu timmisartuussilluni. Selskabili Nunatsinnut mereernermini pisarnertut sullinneqanngitsuungajappoq.
Paasisaqarfiit ilisimasaqarluartut Sermitsiaq.AG-mut paasissutissiipput selskabip Gert Braskimit aqunneqartup nunatsinni oqartussaasunut akiligassani aatsaat akilersimagai Greenland Express Air-ip timmisartua kingulleq Nunatsinnukarluni aallareersoq. Akiligassat akilerneqarsimapput oqartussaasut akitsuutit, timmisartortitseeqatigiiffiit tamarmik nunatsinni mittarfinnik atuinerminni akiligassaat, akilerneqarnissaannik arlaleriarlutik noqqaasareersullu.
Akiligassat akilerneqarsimanngitsuuppata pissutsit Greenland Express Air-imuinnaq ajorluinnalissanngikkaluarput, aammattaarli ilaasunut Kalaallit Nunaanni utaqqisunut. Tamakkua timmisartumut ikinissartik naatsorsuutigissanngikkaluarpaat, tassa suliassaq ingerlanneqartoq tassatuaassammat Danmarkimit Islandimillu ilaasut sullinneqarnerat.
Tassa timmisartoq ilaasoqarani Europamut utissagaluarpoq aammalu akitsuutit, assersuutigalugu timmisartup orsersorneranut, ingerlaannaq akilerneqaqqaassagaluartut.
Selskabili ulorianartorsiorto aningaasanik pisariaqartitsippat, Gert Braskip ilaasalu naatsorsuutigissanngilaat Nunatsinni politikkimit ikiorneqarnissartik. Taamatut Sermitsiaq.AG-mut oqarpoq Naalakkersuisunut ilaasortaq Steen Lynge. Taanna ilaatigut attaveqarnermut Naalakkersuisuuvoq, taamalu aamma timmisartuussinermut.
Ministeri: Politikerit sulianik suliarinnituussanngillat
Steen Lynge naapertorlugu tamatumunnga pissutaavoq isumaqatigiissutigisat atorfillit, politikeriunngitsut, suliarissammatigit:
– Timmisartortitseqatigiiffiit soorlu Greenland Express Air pineqaraangata suliamik suliarinnittussaapput Peqqissutsimut Attaveqarnermullu Naalakkersuisoqarfik aamma Mittarfeqarfiit. Tatigilluinnarpara taakkunani eqqortunik pisariaqartunillu aalajangiisoqassasoq, taanna Sermitsiaq.AG-mut oqarpoq. Taamaattumik aamma politikeri Atassummeersoq naapertorlugu tamanna isumaqarpoq isumaqatigiissutit malinneqassasut:
– Taamaanngippat pissutsit imaalersinnaapput ingerlatsiviit ilaat allaninngarnit pitsaanerusumik atugassaqartinneqalissasut - soorunamilu taamaattoqarsinnaanngilaq. Selskabit ilaasa isumaqatigiissutit atsiorsimasatik naammassisinnaanngikkunikkit naatsorsuutisariaqarpoq pisariaqartumik iliuuseqarfigineqassasut, Steen Lynge oqarpoq.
Greenland Express Air tullianik timmisartuussissamaarpoq marlunngorpat.