Sulisussaqarneq
Suliumanngitsut IA-p oqaluuseritinniarpai
Peter Olsenip Inatsisartunut aalisakkanik suliffissuit sulisussaaleqinerat, tamannalu peqatigalugu suliffissarsiortut amerlanerujussuunerat, Inatsisartunut oqaluuseritinniarpaa
Inuit pisinnaagaluarlutik sulerusunngitsut qanoq iliorfigisinnaavagut? Aalisakkanik suliffissuit ulappuseruttornerup nalaani sulisussaaleqisarnerat, taamaasillunilu landskarsip isertitassarpassuarmik annaasaqartarnera, qanoq iliuuseqarfigisinnaavarput?
Inuit Ataqatigiit tunuliaqutaralugit Inatsisartunut ilaasortap Peter Olsenip, inatsisartut ukiakkut ataatsimiinneranni tamanna oqaluuseritinniarpaa.
Atugarissaarneq, kisiannili...
Politikerip erseqqissarpaa Kalaallit Nunaanni inuiaqatigiit pigissaartuujuarnissaat IA-p tamakkiisumik tapersersoraa. Tamannali peqatigalugu politikerit oqallisigisariaqarpaat killormut pisoq tamanna qanoq isilluni aaqqiivigineqartariaqartoq.
– Ukiuni kingullerni marlussunni tusakulasarsimavarput: Una angut/arnaq sulerusussuseqanngilaq. Isumaginninnikkut ikiorsiissutit naammapput. Ajoraluartumillu taama oqartarneq ilisarnarlunilu eqqortortaqarpoq, Peter Olsen apeqqarissaarutitut oqallisissiamini tunngavilersuivoq.
Tamatuma saniatigut taassuma siunnersuutigaa tamatumani malittarisassat pimoorullugu misissorneqartariaqartut.