kommunit avinneri
Sulisut nuunneqarnissaat pillugu apeqummi Ane Hansenip Qaasuitsup Kommunia isornartorsiorpaa
Kommune Qeqertalimmi sulisussarsiornermi piffissarujussuaq atorneqarsimasinnaangaluartoq, borgmesterinngortussaq Ane Hansen (IA), Qaasuitsup Kommunia arriinnerujussua pakatseqqaffigalugu, oqaatigaa
- Sulisussarsiornissamut piffissarujussuaq annaavarput.
Kommune Qeqertalimmi borgmesterinngortussaq, Ane Hansen (IA) Qaasuitsup Kommuniani sulisut aqqanillit Ilulissaniit Aasiannut nuunnissamut neqeroorummik itigartitsinerisa kingorna, Sermitsiaq.AG-mut oqarpoq,
Taassuma oqaatigaa, sulisut arlallit nuunnissamik itigartitsnissaat naatsorsuutigineqareersimasoq, Qaasuitsup Kommuniatalu qangarsuarli sulisut Aasiannut nuukkusunngitsut suliffissaannik neqeroorfigineqarnissaat pillugu, Kommune Qeqertarlimmut nalunaarutigisimasinnaangaluartoq.
- Atorfiit ullummikkut inuttassaqartinngisavut inuttassarsiuutereernikuuvagut, taanna Sermitsiaq.AG-miut oqarpoq.
Atuaruk: Qaasuitsup Kommuniani sulisut aqqanillit nuukkusunngitsut
Marlunngormammi aatsaat nittartakkami uani paasisimavaa, sulisut Aasiannut nuukkusunngitsut Avannaata Kommuniani suliffissaannik neqeroorfigineqarsimasut.
- Sulisussarsiornissatsinni piffissarujussuaq atorsimasinnaangaluarparput. Julimmi ulluisa aallaqqaataanili sulisut agguarneqarnissaat inissereersimasussaangaluarpoq, taamaammat paasiuminaappoq taakku aqqanillit (Aasiannut nuukkusunngitsut) paasitinneqaratalu, suliffissaannik neqeroorfigineqarsimammata, Ane Hansen Sermitsiaq.AG-mut oqarpoq.
Atuaruk: Kommunit avinneqarnerat: Ima amerlatigisut nuussapput
- Atorfiit ataasiakkaat amigaatigaavut. Naqqaniillu aallartittussaanerput pissutigalugu Avannaata Kommunianit suliassaqarnerujussuuvugut, qularutiginngilara suna tamarmi inissikkumaartoq ulloq 1. januar nallertinnagu, Ane Hansen qularnaveeqqusiivoq.
Taassuma Ilulissaniit Aasiannut nuukkumanngitsut pakatsissutiginngilai.
- Ilaqutariit arlallit pineqarpoq, aalajangernerallu paasisinnaalluarpara. Qaasuitsup Kommunianullu paasissutigaara sulisussarsiornissatsinnik sulineq aallartittariaqaleraat, Ane Hansen oqarpoq.