oqallinneq
Sulisup sakkortuumik FB-mi allannera Sara Olsvigip akuersaanngilluinnarpaa
NAKUUSA-mi suleqatigiit suliniummi aqutsisup Facebookikkut allataa akuersaanngilluinnarpaat, tassani sakkortuumik oqaaseqarkuni oqaasipilullunilu kalaallit qallunaatut oqaluttut kalaallisut oqalussinnaannginnerannik appisaluussivoq.
Naalakkersuisoq Sara Olsvig aamma Danmarkimi UNICEF-imi generalsekretær, Steen M. Andersen, poorski sioqqutilaarlugu sulisup Facebookikkut allataanut akuersaanngilluinnarput. Sara Olsvig aamma Steen M. Andersen UNICEF-imeersoq meeqqat pisinnaatitaaffii pillugit suliniummi NAKUUSA-mi suleqatigiipput.
Atuaruk: Facebookimi oqallinneq: Kalaallisut oqaatsivut ilinniarniarsigit
- Meerartavut tamakkerlugit oqaatsinik arlariinnik ilinniarnissaannut nuannersumik kaammattussavagut. Tamatta isummatta anninnissaannut pisinnaatitaaffeqarpugut, taamaattorli kaammattuutigaara, oqallinneq Facebookimi allaniluunniit ingerlanneqaraluarpat, tunngavilersukkamik kinaassusersiunngitsumillu ingerlateqqullugu, Sara Olsvig tusagassiuutinut nalunaarummi oqarpoq.
Oqaatsit ilinniarniarsigit
Suliniummut aqutsisoq Najaaraq Müller, ulluinnarni NAKUUSA-mi sulisoq, poorski sioqqullugu oqallitsitsingaatsiarpoq, Sermitsaq.AG-milu allaaserisami atuartartut oqallisingaatsiarput. Allatamini maanna peerneqarsimasumi ilaatigut allappoq:
- Paasisinnaanngilluinnarpara kalaallit danskisut oqaasillit tamaani tikilluaqqusaanngitsutut misigalutik meerujunnerat.
Allatami naggataani allappoq:
- Nunatsinni ataqqineqartussanngorlugit inunngorsimapput: sooq qaavatigut piumasaqaqqissappat?! Oqaatsivut ilinniarniarsigit!!!
Meeqqat TAMAASA sullikkaat
Taamatut Facebookimi allataqarnerata Steen M. Andersen Unicefimeersoq ima oqaaseqartippaa:
- UNICEF-mi taamatullu NAKUUSA-mi sulissutigaarput Naalagaaffiit Peqatigiit Meeqqat pisinnaatitaaffii pillugit isumaqatigiissutaat tunngavigalugu siuarsaassalluta. Erseqqissarnerusinnaanngilarput NAKUUSA nuna tamakkerlugu meeqqanullu TAMANUT, taakkulu soqutigisaannut ataatsimoorfiummat – oqaatsit, suiaassuseq, inuiaqatigiinni inissisimaneq, upperisaq kultuurilu apeqqutaatinnagit, UNICEF Danmarkimi generalsekretæri Steen M. Andersen oqarpoq.
Pisoq sulisumut Najaaraq Müllerimut kinguneqartinneqassanersoq Sermitsiaq.AG-p paasiniarpaa.