Sulisitsisut: Erik Jensenip oqaaseqaatai imminnut ataqatigiinngillat

Naalakkersuisut aalisarnermut inatsisissatut siunnersuutissaat Inatsisartunit itigartinneqassasoq Sulisitsisunit kaammattuutigineqarpoq. Allatut iliorniarnerit tamarmik Kalaallit Nunaata siunissaanik navialisitsissutaasinnaasumik pinnguarinninnerussapput, oqarput

Aalisarnermut naalakkersuisup Erik Jensenip susassaqartunik ataatsimeeqateqannginnermi siumooreertumik nalunaarutigaa ukioq kingulleq aalisarnermut inatsisissamut siunnersuut allanngortinnagu siunnersuutigineqassasoq.

Imminnut ataqatigiinngillat
Tamanna Sulisitsisunit isornartorsiorneqarpoq.

- Imminnut ataqatigiinngillat, Naalakkersuisoqarfiup tusagassiutitigut nalunaarutaanni inatsimmut uparuaatit tusarumaneqassasut unnersimanera, illuatungaatigullu nalunaaruteqarneq inatsisissatut siunnersuut allannguuteqanngitsumik saqqummiunneqaqqissasoq. Taamatut ilisumik ataatsimeeqateqarneq siammasissumik isumaqatigiissuteqarnissamik siunertaqarani ilisimatitsissuteqarneruinnartutut isikkoqarpoq, Sulisitsisuni pisortaq Brian Buus Pedersen tusagassiutinut nalunaarummi allappoq.

- Sulisitsisut siunnersuusiornikuupput suleriusissatut siunnersuummik, tassani pineqartumut attuumassuteqartut aaqqissuussaalluartumik peqataatinneqarnissaat, tassalu inatsisissamik allannguilluni nutarterinikkut, anguniarumallugu maannatut inngitsumik, malitsigiumaakkanik sukumiisunik misissukkanik tunngaveqartumik ilusiliinisaq, apeqqutinik pingaaruteqartunik akineqanngitsunik imaqanngitsumik. Taamatullu sulinissaq Naalakkersuisut Inatsisartullu inatsisissamut nutaamut paragrafissanik aaliangersuitinnatik politikkikkut qulaajarumasaat tunngavigalugit ingerlanneqassaaq.

Piujuaannartitsinissaq
Sulisitsisullu kissaatigaat tigummiinnarumallugu aalisarnerup, ullumikkut ukiumut pisortat karsiinut 1 mia. koruunit pallulligt naakkaatitsisuusup, nungusaataanngitsumik ingerlatiinnarneqarnissaa.

- Inatsisartunut kaammattuutigiumavarput Naalakkersuisut inatsimmik suliarititsiniarnera itigarteqqullugu, pisariaqartumik sioqqutsisumik suliarisariaqartut naammassineqarnissaasa tungaanut. Allatut iliorniarnerit tamarmik Kalaallit Nunaata siunissaanik navialisitsissutaasinnaasumik pinnguarinninnerussapput, Sulisitsisuni pisortaq oqarpoq, nangillunilu:

- Taamaattumik Naalakkersuisut Inatsisartullu nuna tamakkerlugu isumaqatigineqartumik aaliangiinissaq angujumallugu oqaloqatigiillutillu suleqatigiinnissaat kaammattuutigiumavarput, taamatut iliornikkut nunatsinni aalisarnerup tunngaviata tigummiinnarneqarnissaa isumannaarumallugu.

Powered by Labrador CMS