arbejdsmiljø
Sulisitsisut: Sulisut takoqqusaarluni politikkernermik pilliutigineqarput
Kattuffik kalaallit suliffeqarfiisa soqutigisaannik suliaqartoq, Sulisitsisut, Naalakkersuisut suliffiit avatangiisiinik nakkutilliinerup akisussaaffimmik tigusinissaat ernummatigilluinnarpaat. Tamanna 10 millionit koruuninik naleqarnissaa sulisitsisut nalilerpaat.
- Naalakkersuisoqatigiit Kalaallit Nunaata tigusinermi aningaasartuutit annertuut aammalu suliassanut atatillugu teknikkikkut inatsisitigullu unammiugassat nammassallugit artussannginnamikku uppernarsaasillutik takussutissiinnginnerat ernumatitsivoq, Sulisitsisuni pisortaq Brian Buus Pedersen, tusagassiuutinut nalunaarummi taama oqarpoq.
Ajunngitsumik ingerlavoq
- Suliffigisat avatangiisiinik nakkutiginninneq ullumikkut uparuagassartaqanngitsumik ingerlanneqarpoq, taamaammallu aamma naammanngilaq tigusinissamik kissaateqarneq tunngaviliinnassallugu, oqarluni tamanna pissusissamisoortoq Kalaallit Nunaata namminiilivinnissamut ingerlanera eqqarsaatigalugu. Taamatut iliornikkut suliffeqarfiit sulisuilu takoqqusaaginnarnertut ittumik politikkernermi pilliutugineqassapput.
Suliffiit avatangiisiinut nakkutiginninnerup akisussaaffigilerneqarnera 10 millionit koruunit missaannik akeqassaaq, Brian Buus Pedersen naqissusiivoq, aningaasat taakku inunnik isumaginninnermut aamma atuarfeqarnermut atorneqarnissaat takorusunnerugaluarpaa.
Akileraarutit qaffanneqarnissaat ernumassutaasoq
- Kalaallit Nunaanni Sulisitsisut Peqatigiiffiat naliliivoq, Naalakkersuisut pisussamut aningaasartuutissat unammiugassallu pillugit peqqissaarussaavallaanngitsumik nalilisut. Ernummatigaarpullu aningaasartuutaalersussat peqqutigalugit akileraarutit qaffatsinneqartussaassasut aammalu suliffeqarfiit atuisutut akiliutitigut annertunerusumik nammatassinneqassasut, Brian Buus Pedersen nalunaarummi oqarpoq.