nytårstale
Sulisitsisut: Suliassanut pilersaarutit aalajangersimasut amigaataapput
Sulisitsisut sakkortuunik oqaaseqarlutik Naalakkersuisut siulittaasuata Kim Kielsenip ukiortaami oqalugiaataa isornartorsiorpaat oqaatigalugulu anguniagassanik iliuusissatullu pilersaarutinik aalajangersimanerusunik amigaateqartoq
Sulisitsisut Naalakkersuisut siulittaasuata Kim Kielsenip (S) ukiortaami oqalugiaataa atuarluaqqissaareerlugu, isorisaqarlutillu nersualaarinnipput. Siulittaasup ingammik meeqqanut inuusuttuaqqanullu tunngasunik oqaasii Sulisitsisunit isumaqatigineqarput. Naalakkersuisut siulittaasuata meeqqat sumiginnakkat atornerlunneqarsimasullu inuiaqatigiinnit isumagineqarnissaat pingaartillugu oqaaseqarnera tamakkiisumik tapersersoritsik aamma ilaqutariit akisussaaffimminnik sumiginnaasut ikiorneqarnissaat isumaqatigilluinnaramikku, taakku maluginiaqquaat.
– Suliniutiginiarneqartut nutaat anguniakkanik nutaanik iliuusissatullu pilersaarutinik malitseqarnissaat qilanaaraarput, Sulisitsisuni pisortaq Brian Buus Pedersen oqarpoq.
Atuaruk: Kim: Ukiut tamarmik meeqqat ukiorisariaqaraluarpaat
Ineriartorneq nuanniitsoq unittariaqalerpoq
Nersualaarinninnerli tassunga killeqarteriarlugu oqaaqqissaarisoqarpoq.
– Ineriartorneq nuanniitsoq tamanna maanna unitsinneqartariaqarpoq. Meeqqanik sumiginnaaneq atornerluisarnerlu inuiaqatigiinni alianartuuvoq, piaarnerpaamik iliuuseqarfigineqartariaqartoq, taanna oqarpoq.
Aamma taassuma Inatsisartuni amerlanerussuteqartut, siulittaasup isumaqatigiinniarnermigut nammineq partiimi Siumup, partiillu saamerliit, Inuit Ataqatigiit aamma Partii Naleraq peqatigalugit naalakkersuisooqatigiinnissamut isumaqatigiissutaat oqaaseqarfiginngitsoorumanngilaa, tamannami pimmat partiinut talerperlernut Demokraatinut aamma Atassummut naalakkersuisooqatigiinnissamut isumaqatigiissutip atorunnaarsereerneratigut.
Atuaruk: Meeqqat Illersuisuat: Maannakkorpiaq iliuuseqartoqartariaqarpoq
– Naalakkersuisoqatigiilersut innuttaasunik amerlanerussuteqarluartunik tunuliaqutaqarmata aamma Inatsisartuni ilaasortanit 24-usunit piginnaatitaanermigut politikkiminik piviusunngortitsinissamut pissaaneqarluni, Kim Kielsenip erseqqissarpaa. Siusinnerusukkut oqaatigeriikkatsitut naalakkersuisoqatigiilersut isumaqatigiissutaanni arlalinnik pitsaasunik isumaqatigisaqarpugut, taamaattorli anguniakkanik piviusunik naammassineqarsinnaasunillu amigaateqarluta, Brian Buus Pedersen oqarpoq.
Allaaseriaq tamaat Sermitsiami kingullermi tallimanngormat saqqummertumi atuarneqarsinnaavoq. Aviisi uani pisiariuk: