RAL-imi tukanneq
Sulisitsisut Royal Arctic Linemut sakkortuumik isornartorsiuisut
Piffissami kingullermi Royal Arctic Linep ajornartorsiuteqarnera Sulisitsisut akuleruffigaat. Taakku RAL-ip sullitaminik sumiginnaasutut ilisimasaqanngitsutulli ingerlatsinerat sakkortuumik isornartorsiorpaat.
"RAL-ip sullissani sumiginnarpai."
Sapaatip akunnerup naanerani Sulisitisut Royal Arctic Linemut taama ersaritsigisumik qulequtsiillutik isornartorsiuipput.
RAL qaammatini kingullerni ajutoornernerit nangitippoq. Suliffeqarfimmi it-systemip atuutitsilerniarnermini ajornartorsiuteqarput tassani containerit nioqqutissallu kukkullutik piffinnut niusarsimavaat.
Aammattaaq containerinik assartuut Mary Arctica nassiussanik useqarluni maajip ulluisa 31-ni unnukkut Nanortalimmiit Aalborgimut aallarluni iluliamut aporpoq. Umiarsuarli misissorluarumallugu Qaqortumukaanneqartariaqarsimasimavoq, tassanili umiarsuup amutsiviliaanneqartariaqarnera paasineqarsimavoq.
Aamma atuaruk: Royal Arctic Line ajutoornernik nangitittoq
Tassa tamakku RAL-ip piffissami kingullermi unammiligassaasa ilamininngui.
Aaqqiissutissat nutaat
Suliffeqarfillu aaqqiissutissanik nutaanik misiliiniarnera Sulisitsisut paasisinnaallugu oqaatigaa. Pitsaanerusumilli attaveqatigiinnernik ingerlatsisimasinnaangaluarput.
- Sulisitsisut (GE-p) paasisinnaavaa, RAL-imi aqutsisuusut periarfissanik nutaanik misileerusunnerat, nunatsinni suliffeqarfinnut innuttaasunullu iluaqutaasussatut isumaqarfigisaminnik. Kisianni sakkortuumik uparuartariaqarpoq, allannguutit suaarutigineqartut Kalaallit Nunaanni imaatigut angallassinermut annertuumik allannguutinik imaqartut ingerlanneqarmata RALip sulliviit ukiorpassuarni ilisimasanik misilittakkanillu katersaqartut pimoorussisumik akuliutsinnagit. Sulisitsisut pisortaanera Brian Buus Pedersen oqarpoq.
Ilisimasaqanngitsutut pissusilersorneq
RAL-ilu attaveqatigiinneq immikkut pitsanngorsaavigisariaqaraa, Sulisitsisut isumaqarput.
Aamma atuaruk: Royal Arctic Linep ajutoorneq pillugu: ''Ajutoorneq ajussusia''
- Sulisitsisut piffissami sivisuumi suliffeqarfinnit puullaaqqisunit saaffigineqartarpoq, RAL-ip sullissinerata pitsaassutsikkut ajorsiartuinnarnera pillugu. Sullissinikkut ajornartorsiutit suliffeqarfiup sullissaanut tuniluukkiartuinnartut pillugit, paasiuminaatsinneqartarluni sooq niuertarfinni pisiassanik allanillu nunatsinni suliffeqarfiit pisariaqartitaannik amigaateqartalerneq, Brian Buus Pedersen oqarpoq nangillunilu:
- Puullaaqineq suli sakkortusiartortinneqarpoq, sullisaasut misigisimanerannik, RAL-ip saaffiginnissutinik ajornartorsiutinillu oqariartuutigineqartartunik pimoorussisumik tigusineq ajorneranik, misigisimasarlutik qarsupittumik pineqartutut malugitinneqartarlutik, soorluli namminneq Kalaallit Nunaanni inuussutissarsiornermik ilisimasaqanngitsutut.
Akisussaaffik annertooq
RAL-i kisermaassisutut ingerlanermini akisussaaffeqartoq, Sulisitsisut naqissuserpaa.
Aamma atuaruk: Royal Arctic Linenip umiarsuaataa iluliamut aportoq
- RAL-p imaatigut assartukkanik kisermaasinissamik tunineqarnikuunera Kalaallit Nunaat tamakkerlugu pingaruteqarluinnartuuvoq, tamannalu RALip aammalu piginnittaata, Namminersorlutik Oqartussat, pitsaasumik ingerlanneqassammat akisussaaffigivaat. Taamaanngippammi sunniuterpassuit aallartissapput suliffeqarfinnut namminersortunullu aningaasartuutit qaffannerinik pitsaassutsillu ajornerulernerinik malitseqartumik, Brian Buus Pedersen, naggasiilluni RAL-imut Naalakkersuisunulli kaammaatuuteqannginnermini oqarpoq.
- Taamaattumik Sulisitsisut Peqatigiiffiata tungaanit RAL Naalakkersuisullu kaammattorumaneqarput, akisussaaffitik pimoorussillutik ingerlateqqullugit isumannaarumallugit torersumik ingerlanissaq aammalu suliffeqarfiup sullissaasa suleqataasalu akornanni tatiginartumik oqaloqatigiissinnaanissaq