peqqusersaarutit
Sulisitsisut pisiat allagartaanut peqquserluttuliuutinut mianersoqqusipput
Suliffeqarfiit arlallit nunanit allanit suliffeqarfinnit akiligassanik peqquserluttuliuutinik nassinneqarsimapput
Suliffeqarfimmi World Business Searchimit Montenegromiittumit poortukkamik akiligassarnik pissarsisimallutik eqqaamasinnaanngikkukku, imaluunniit qarasaasiamut programminik Office Worldimit Barcelonamiittumit pisisimanngikkuit, taava eqqaamasaatitit illit ajorsimassanngillat.
Suliffeqarfiusaartut
Sulisitsisut kattuffiata mianersoqqussutigaa, taakku suliffeqarfiusuusaartut marluk, kalaallit suliffeqarfiinut akiligassanik nassiussuimmata.
- Pisiat allagartaannik peqquserluutinik taakkunannga suliffeqarfiusuusaartunit pissarsivugut. Kisianni amerlaneroratarsinnaapput, Sulisitsisut allattoqarfiani pisortaq Karsten Klausen ilisimatititsivoq.
Ukiumut ataasiarlutik
Kattuffiup suliffeqarfiit pisiat allagartaannik peqquserluutinik pissarsisarnerat qanoq akulikitsiginersoq kisitsisitaqartinngilaat, tassani nassiussisut nakkutilliisut ajutoornissaat neriuutigisarpaat, taamaalillutillu akiligassat akilerneqartarput, naak suliffeqarfiit pisisimanngikkaluartut.
- Kisianni mianersortumik missiliorneqarsinnaavoq, suliffeqarfiit amerlasuut ukiumut ataasiarlutik akiligassamik peqquserluummik pissarsisarput, Karsten Klausen oqarpoq