unammilleqatigiinneq
Sulisitsisut: KNI unammilleqatigiinnermut naleqqutinngitsumut sakkuginagu
KNI-p Pisiffimmut unammillernissaanik oqariartuuteqarneq, Sulisitsisut akuerinngilluinnarpaat
Aammaaqqiguk!
Pisiffiup namminersortup KNI-p Namminersorlutik Oqartussanit pigineqartup unammillertariaqarneranik Nusuka oqariartuuteqareersorlu, Sulisitsisut kattuffia taama qisuariaateqarpoq.
Qaqutigoortoq
- Qaqutigoortuuvoq, sulisitsisut kattuffiisa tungaannit pisortat suliffeqarfiutaannik kaammaattuisarneq namminersorlutik suliffeqarfinnik unammillernissaannik. Ilami aamma taamatut iliorneq namminersorlutik suliffeqarfiit nukittorsarniarlugit sinaakkusiornissamik oqariartuummut illuatungiliulluinnartuussammat, Sulisitsisuni pisortaq Brian Buus Pedersen taama oqaaseqaateqarpoq.
Tassunga atatillugu tikkuartorpaa, tassani 2001-mi Pisiffimmik namminersortunngortitsineq – poliikkikkut tunuliaqutserneqartumik – iliuussaasoq pingaaruteqartoq.
- Taamaattumillu kingumut uteriarnerussaaq aaliangiussaq allanngortinniarneqalissappat. Namminersorlutik ingerlatsisut kikkummi taava pisortat aningaasaataannik tunuliaqutaqartunit unammillerneqalernissamik ernumatitaasussatut tullinnguutissappat?, Sulisitsisuni pisortaq aperivoq.
Aningaasaliisut
Tassami oqariartuutit taamaattut Kalaallit Nunaannut aningaasaliisussanut piukkunnerulersitsinavianngimmata.
- Tassani Nusukap kaammaattuutaa, tassalu pisortat pigisaata namminersortunut unammillernissaa, aningaasaleerusussinnaasunit qanormita isumaqarfigineqarpa? Taasani eqqarsaatigaakka inuit ataasiakkaat aningaasaliisinnaasut takussaareersut – aammali nutaat, nammineq qunusiarilinngikkutsigit takkussinnaasut, Brian Buus Pedersen erseqqissaavoq.
Sinaakkutit pitsaanerit
- Sulisitsisunit politikerinut kaammaattuutigiumavarput, inuussutissarsiornerup unammilleqatigiinnerullu iluini sinaakkusiortoqassasoq, sapinngisaq tamaat pinngitsortinniarneqasallutik pisortat aningaasalersuinerulerlutillu killilersuiniarnerulernissaat, ilanngullugu oqarpoq.
Taassuma pisortap ilanngullugu erseqqissaatigaa, isummersorneq KNI-mut uparuartuutaanngitsoq.
- Killormorluinnaq. Taassumami ataani Pilersuisumik taallugit ingerlanneqartut Sulisitsisut isumaa malillugu illoqarfinni, nunaqarfinni isorliunerusunilu namminersorluni niuertarfiuteqarnikkut unammillersinnaassuseqartumik ingerlatsiviusinnaanngitsuni pitsaalluinnartumik pisariaqartumillu suliaqartuupput. Tamannalumi isumagisariaqartut iluini agguaasseqataalluarneruvoq, Brian Buus Pedersen erseqqissaavoq.
Atuaruk: Namminersorlutik Oqartussat Pisiffimmut unammilleqqullugit inassuteqartoq