Sulisitsisut kattuffiata Sisimiuni sanaartorneq aallarteqqinnissaa piumasaraa

- Ukiumi 2013-imi Sisimiuni Sulisitsisut kattuffiat ingerlalluarpoq.

Sisimiuni Sulisitsisut kattuffianni siulittaasoq Lars Møller-Sørensen ukiumut qaangiutereersumut naliliivoq.

Sisimiuni Sulisitsisut kattuffiat, Kalaallit Nunaanni Sulisitsisut kattuffiannut atasoq, sapaatip akunnera kingulleq tallimanngornermi ataatsimeersuarpoq.

Sisimiuni sanaartortoqannginnera aarlerineqarpoq.

Aningaasat
- Sanaartorneq uninngalluinnangajaavippoq. Tamanna akuersaarneqarsinnaanngilaq. Kommunemi Inatsisartunilu ilaasortat illoqarfitsinni sanaartornermik annertuumik aallartitseqqittoqarnissaanut suliniuteqalissasut kaammattuutigaarput, Lars Møller-Sørensen oqarpoq.

- Illoqarfimmi sanaartorneq unitsinneqartussaanngikkaluarpoq, sanaartornermimi unittoqaraangat illoqarfimmi unittoortoqartarmat. Sanaartornerit aallartinneqaraangata aningaasat nammineerlutik uteqqittarput. Suliffeqarfiit uummaqqittarput sulisut aningaasarsitinneqaraangata, suliffeqarfiimmi allat aamma tamanna malugisarpaat.

- Sanaartornermi uninngasoqarnera pissutigalugu suliffeqarfiit sanaartornermik suliaqartut sanasunngornianik tigusiumavallaarneq ajorput. Soorunami sanaartornermik suliaqartut ilinniartunik tuguserusuttaraluarput, siunissarli nalorninartoqarnera pissutigalugu tamanna tunuarsimaarfigineqartarpoq, Sisimiuni Sulisitsisut kattuffianni siulittaasoq oqarpoq.

Namminersortunngorsaanerit amerlineqarnissaat
Illoqarfimmi sanaartornermik ingerlataqartut namminersortunngorsarneqarnissaat kissaatigineqarpoq.

- Suliffeqarfiit namminersoraangata nutaanik eqqarsarnerit pilersarput, suliffeqarfittut ingerlaqqissagaanni tamanna pingaaruteqartorujussuuvoq.

- Qeqqata Kommuniani assigiinngitsuni namminersunngorsaasimanera nuannaarutissaavoq, Sisimiuni Sulisitsisut kattuffianniilli tamanna amigarineqarpoq. Namminersortunngorsaanerimmi iluaqutaasorujussuusarput. Qeqqata Kommunianut taamaattumik kajumersaariinnassaagut namminersortunngorsaanerit amerlanerulissasut.

Suut namminersortunngorsarneqarsinnaanersut Qeqqata Kommunianut oqaloqatiginninnissamut Sisimiuni Sulisitsisut kattuffiata siunersuuteqarnissamut oqaloqatiginninnissamut piareeqqavoq.