Erhvervspolitik

Sulisitsisut inuussutissarsiornermut politikkimik takorruuisinnaasumik ujartuipput

Naak sulisitsisut peqatigiiffiata pingasunngornermi ullaap tungaani tusagassiortunik katersuutsitsineranni seqinnarikkaluartoq, Sulisitsisut (GE) upernaarsiorpalaarlutik qiimanngillat

Pisortaq aamma siulittaasoq pakatsisimaarput - Brian Buus Pedersen aamma Henrik Leth - politikerinullu isornartorsiuinerat naassaanngilaq.

Naak inuussutissarsiornermut politikki?
Politikkikkut systemip inussutissarsiornermut politikkimik ineriartornermik siuariartornermillu qulakkeerinnittussamik isumasiunnginnerat, taakku marluullutik isornartorsiuineranni qitiuvoq.

- Inuussutissarsiornermut politikki oqaluuseritissallugu ajornakusoorpoq. Inuussutissarsiornerup ineriartorneq aamma inuiaqatigiit atugarissaarneranut aningaasaliinissaq qulakkeertussaavaa, pisortaq Brian Buus Pedersen oqarpoq, peqatigiiffiup annerusumik nuna tamakkerlugu, politikerinut tamanut, tusagassiorfinnut aamma isummersortartunut attaveqateqarnissamik anguniagaqalerlutik taanna ilisimatitsivoq.

Partiini siuttut ataatsimiinnissaat
Inuussutissarsiornermut politikki politikkikkut oqallisaalersinniarlugu aallartitat ataatsimiinnissaannut partiimi siuttut tamarmik qaaqquneqarsimapput, tassani nuna tamakkerlugu suliffeqarfinnit 65-init aallartitat peqataassapput.

- Partiini siuttut tamarmik inuussutissarsiornermut politikkertik erseqqissarnissaanut oqalugiartinneqassapput, pisortaq ilisimatitsivoq, peqatigiiffik marsip 25-anni aallartitat ataatsimiinneranni peqatigiiffiup ukiut 50-inngortorsiornerat malunnartinniarlugu oqaluttuarpoq, tamanna oktobarimi siorna anguneqarpoq.

Siulittaasoq qinigassanngorteqqittoq
Siulittaasoq Henrik Leth siulittaasutut qinigassanngorteqqinniarpoq, naak nuna aningaasarsiornikkut ingerlalluaraluartoq neriulluarluni oqariartuuteqarnissaq ajornakusoortikkaluarlugu tassani siulittaasooqqissagunarpoq.

- Maanna ingerlavittut oqaatigisarput atorparput, tulliullugulu politikkikkut ingerlatsinikkut tunuariarluta. Sorpassuit anguniarneqarput, kisianni akeqalersullu ungasissumik anguniakkat pineqarunnaartarput, Henrik Leth oqarpoq assersuusiorlunilu.

Milliardinik aningaasaliissuteqarneq
- Pisassiissutinut agguaasarnernullu ilisimasatsinnut tatiginnilluni kilisaatinik nutaanik 1 milliardit missaannut aningaasaliisoqarnikuuvoq. Tassanngaannaq pisassiissutit 10 procentii tunuartinneqarput, allallu niuernermut peqataassasut nalunaarutigineqarluni. Aningaasaliinerit taamaalillutik neriorneqariasaarput, Henrik Leth, Polar Seafoodimi pisortaq naqissusiivoq.

Taakku marluullutik inuussutissarsiorfinnut taamaaliornernut mianersoqqusipput.

Kalaallit Nunaat nakkutigaat
- Aatsitassarsiornermut aningaasaliisartut aalisarnermut politikkikkut pisut nakkutigigaat, politikerit qularissanngilaat. Politikkikkut systemi ungasissumut toraagaqarluni inuussutissarsiornermut politikkeqanngippat aningaasaliisoqarunnanngilaq, taakku marluullutik naqissusiipput, nunanit tamalaanit aningaasaliisartut oqariartuutit tamaasa malinnaaffigisaraat kalaallit politikerit ilisimanngikkaat maluginiaramikku.

- Politikkikkut qularnartumik avatangiiseqartumut aningaasaliiumasoqarneq ajorpoq.

Henrik Lethip aamma politikkikkut aatsitassanut akisussaasup piiaaffiit marluk suliniutaasut aallartisarneqarnerat nuannaarutigineqarnissaanik oqariartuuteqartoq isumaqatigivallaanngilaa.

Aamma atuaruk: Allattorsimaffimmi appariarneq Múte B. Egedep ugguaraa

- Suliniutip aappaata aallartinnissaa suli ungasippoq. Suliniutip aappaata (rubinisiorfiup, aaqq.) inissinnissaa ukiuni pingasunik sisamanik sivisussuseqarsimavoq. Utoqqatserpunga, ujaraarartarfimmi tassani aallartinniarneq sooq taama sivisutigissava, siulittaasoq peqqusaarpalaartumik nipeqarluni unammilligassat erseqqissarpai.

Pitsaasoq
Eqqarsalaareernerulli kingorna pitsaasumik tigussaasumik eqqaasaqarsinnaavoq, tassa aatsitassanut naalakkersuisoqarfiup aamma Sulisitsisut aatsitassarsiorneq pillugu Torontomi ataatsimeersuarneranni suleqatigiinnerat.

Aamma atuaruk: Aatsitassarsiornermut aningaasaliisartut Kalaallit Nunaat tunuppaat

- Aatsaat siullermeerluta aaqqissuussami suleqatigiippugut, tassani aatsitassarsiornermi aningaasaliisartunut Nunarput sammitipparput. Tamanna pissusissamisoorpoq, Nunarpullu pillugu tusagaqarusuttut amerlapput, sulisitsisunit oqaatigineqarpoq, taamaallillutillu ataatsimiittafik seqinermit kialaartinneqartoq upernaakkut neriulluarfiunissaanik oqariartuuteqarlutik.

Powered by Labrador CMS