inuussutissarsiorneq
Sulisitsisut: Ajornartorsiorneq isiginngitsuusaarnagu
Kalaallit Nunaanni Inuussutissarsiortut (GE) siulitaasuata Henrik Lethip peqatigiiffimmi aallartitat arfininngornermi ataatsimiinneranni nalunaarutimini erseqqissaalluni oqaatigaa, aningaasarliorneq naalakkersuisooqatigiit Siumumit siuttuuffigineqartut ilungersunartorsiornermik nassuerutiginniinnarnerisigut qaangerneqarnavianngitsoq. Iliuuseqarneq kisimi iluaqutaassaaq
Siulittaasup tamatumunnga atatillugu tikkuarpaa, naalakkersuisooqatigiit Nunatta Karsiata amigartooruteqarnera qaangerniarlugu sukaterinissamik anguniagaqarnera kimilluunniit isumaqatiginngitsoorneqarsinnaanngitsoq: Siunissami siuariartornissamut, ilinniartitaanermut suliffissaqartitsinermullu aningaasaliinikkut. Nunatsinni aningaasaqarnerup pitsaanerusumik aqunneqarneratigut. Akileraarutitigut isertitat tamarluinnaasa atugarissaarnerulissutiginerisigut. Inooqatigiinnermilu naligiinnerup qulakkeerneratigut.
Tamatumanilu politikerit pilersaarutaat tassaavoq 2015-imi missingersuutigineqartumik 85 millioner koruuningajannit amigartooruteqarnermiit naatsorsuutit 2018-imi oqimaaqatigiilersinnissaat.
Aaqqissuusseqqinnermilli suliap sukkatsisinneqarnissaa tamatuma peqatigisaanik aalajangiisuussaaq.
- Aarlerisaarutit erseqqilluinnarput: Ajornartorsiorneq atuuppoq - sukkatsikkiartorlunilu, Henrik Leth, aningaasaqarnermi pissusiviusunik erseqqissaasoq, oqarpoq: Naalakkersuisut Pituffimmmi sakkutooqarfimmit isertitakinnerunissaq, raajartassiissutit ukiut siuliinut sanilliullugu ukioq manna ikileriangaatsiarnissaat, siunissami qaninnermi aatsitassarsiornikkut suliniutit annikitsuinnaanissaat tamatuma qaavatigut utoqqaat amerlanerulernissaat sulisinnaasullu ikinnerulernissaat naatsorsuutigaat.
- Tamatuma kinguneranik aningaasartuutit isertitanit amerlanerulissapput. Sipaarniartoqartariaqalissalluni, pisortanilu aningaasaqarneq sakkortuumik aalajangersimasumillu pissuseqarluni aqunneqartariaqassalluni. Naalakkersuisullu allaffissornikkut sipaarniutissanik 50 millioner koruuninik 2015-imi piviusunngortinneqareersussanik piviusunngortitsinissaq suli amigaatigaat, GE-p siulittaasua nalunaarutimini oqarpoq.
Henrik Lethip tamatuma peqatigisaanik erseqqissaalluni oqaatigaa, sulisitsisut peqatigiiffiata ilaatigut pisortani sipaarniarnissaq, ingerlatsinermi naammassisaqarnerusinnaanissaq minnerunngitsumillu inuussutissarsiornermut sinaakkutissat erseqqinnerunissaat pilersitseqqinniarnermi piffissami sivitsortumi tikkuartarsimagai.
- Naalakkersuisut aaqqissuusseqqinnermik suliamik sukkanerulersitsinissaat ilimagissallugu pissusissamisoorpoq. Kalaallit Nunaat utaqqeqqinnissamut akissaqanngilaq. Nunarsuarmimi tamarmi aningaasaliisartut annaasaqariaannaasut taakkorpiaat unammillissutigineqarput. Tatiginninneq pineqarpoq, Naalakkersuisullu - aningaasaqarnikkut inooqatigiinnikkullu naqqanniffigisinnaanngisatsinnut killitsinnata aaqqissuusseqqinnissamik suliniutinik piaartumik aallartinneqarsinnaasunik anguniagaqartariaqarput, GE-p siulittaasua oqarpoq.
Aallartitat Nuummi ataatsimiinneranni peqatigiiffiup aterminik Grønlands Arbejdsgiverforeningimit Grønlands Erhvervimut allanngortitsinissani akuersissutigaa, peqatigiiffiup sulisitsisunut isumaqatigiissutinik isumaqatigiinniarnernik ingerlatsisutut peqatigiiffiunermi saniatigut inuussutissarsiornikkut politikkikkut suliassat arlalissuit isumagisarimmagit.
Henrik Leth qinigaaffimmut ukiunik marlunnik sivisussuseqartumut qinigaaqqippoq.