Thursday, April 20, 2017 - 12:56

Suliniutit makku aningaasaliiffigineqarput

Assi.: Nationalbanken
Suliniutit 37-t Namminersorlutik Oqartussat kulturimut aningaasaliissutaannik aningaasanik pissarsisimapput

3.950.373 koruunit.

Kulturimut aningaasaliissutit agguaanneqartut taama aningaasartaqarput.

Ilinniartitaanermut, Kultureqarnermut, Ilisimatusarnermut Ilageeqarnermullu naalakkersuisup, Doris Jakobsenip, suliniutinut assigiinngitsunut 37-inut tapiissutinik agguaassivoq. Aningaasat agguaanneqartut aningaasaliiffinniit sisamaniit agguaanneqarput.

Kultureqarnermut aningaasanit suliniutinut assigiinngitsunut arfinilinnut 1.069.008 koruuninik tapiissutinik tunniussisoqarpoq, taakkunannga ilaatigut eqqumiitsulianik saqqummersitsinerit, isiginnaartitsinerit assigisaallu matussusiivigineqarput.

Aningaasat inunnit ataasiakkaanit, kattuffinnit il.il. suliaminnut suliniutiminnullu atatillugu qinnutigineqarsinnaapput, pingaartumillu aningaasarsiutigalugu eqqumiitsuliortut ingerlataannut suliniutaannullu suliniutinullu allanut eqqumiitsuliornikkut qaffasissusilimmik suliaasunut aningaasat tunniunneqarnerusarput.

Filmiliornermik ingerlataqartunut aningaasanit filmiliornermik pilersaarutinut qulingiluanut katillugit 1.587.793 koruuninik tapiissutinik tunniussisoqarpoq. Filmiliornermik ingerlataqartunut aningaasanit kalaallit filmiliornermik pilersaarutaanut tapiissutinik qinnuteqartoqarsinnaavoq, pingaartumik oqaluttualiornernut piviusuliornernullu.

Atuakkanut kalaallisut allatanik saqqummersitsisussanut tallimanut aningaasanik katillugit 479.571 koruuninik agguaassisoqarpoq.

Taakkua qaavisigut kulturimik sulialinnut qaammammut agguaanneqartartut 22.000 kr. eqqumiitsuliornikkut suliaqartunut qulingiluanut agguaanneqassapput. 

Suliniutit sorliit tapiissutinik pissarsisimanersut uani takukkit

Qinnuteqarnissap tullianut piffissaliussaq ulloq kingulleq tassaavoq 1. maj, Namminersorlutik Oqartussat ilisimatitsipput.

Seneste nyheder / Nutaarsiassat kingulliit