ilinniartitaaneq

Suliniutip nutaap oqaatsinik ilinniarneq pitsanngoriartissavaa

Immikkut ilisimasallit atuarfinni oqaatsinik ilinniartitsineq qanoq nukittorsarneqarsinnaanersoq maanna misissuiffigissavaat. Tassani kalaallisut, qallunaatut tuluttullu pineqarput.

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisup Doris Jakobsenip suleqatigiissitaq sisamanik inuttaqartoq pilersippaa, taanna aappagumut qanoq pitsanngorsaasoqarsinnaaneranik inassuteqaatinik saqqummiussisussaq.

Kivinneqartariaqalertoq
- Nunatsinni meeqqat atuarfiat pillugu Danmarks Evalueringsinstitutip nalunaarusiaa atuareerlugu, uannut ersarissilluinnarpoq, atuarfitsinni oqaatsinik ilinniartitsineq annertuumik pitsanngorsaavigineqartariaqartoq. Suliassaq annertuvoq, angusaqarluassaguttalu aallaqqaammut misilittakkatigut ilisimasatigullu tunngavissaqarluartariaqarpugut. Suliassaq tamanna immikkut ilisimasalittut suleqatigiissitat aallartilerpaat, inerniliiumaarnerallu assut pissagangivara, Doris Jakobsen tusagassiuutinut nalunaarummi oqarpoq.

Aamma atuaruk: GUX-mi ilinniartunut amerlasuut oqaatsit aporfigisarpaat

Immikkut ilisimasalittut suleqatigiissitani inuttaapput Kalaallit Nunaannit, Islandimit, Danmarkimit Canadamillu pineqartup iluani immikkut ilisimasallit sisamat. Suleqatigiissitani siulittaasoq, Københavnip Universitetianbi arlariinnik oqaaseqarnermik professoriusoq oqarpoq:

Suliassaq pissanganartoq
- Nuannaarutigaara atuartut oqaatsinik ilikkagaqartarnerisa patajaallisarnissaannut atatillugu unamminartut maanna Kalaallit Nunaanni misissorneqarnialermata. Suliassaq pingaaruteqarlunilu pissanganartuuvoq, aallartinnissaalu suleqatigiissitani ilaasortat tamarmik qilanaarivaat.

Powered by Labrador CMS