takornarialerineq
Suliniut: Nuuk ilinnut qanoq isumaqarpa?
Sermersuumi inuussutissarsiornikkut siunnersuisoqatigiit aamma Visit Greenland suleqatigiillutik suliniuteqarput. Tassani Kalaallit Nunaata illoqarfiisa pingaarnersaat nittartakkakkut malunnartinniarneqalerpoq
Nuummi inuit nuannarisatik pillugit assinik saqqummiisinnaassapput juuni qaammat naallugu. Aamma assilineqartoq oqaasertalerneqartassaaq.
Facebookimi qunnernermi 'I love Greenland'-imut imaluunniit Twitterikkut Instagramikkulluunniit #ColourfulNuuk allallugu ilanngunneqarsinnaapput.
Suliniutigineqartup saqqummiunneqareernerata kingorna sivitsunngitsoq inuit 15-it assinik saqqummeereerput. Assini ilaapput soorlu Nuup Kangerluani assilineqarsimasut, umimmaap neqaanik nerisassiorneq, kiisalu Nuuk aasaatillugu ukiaatilluguluunniit assilineqarsimasut.
'Colourful Nuuk' aqqutigalugu malunnartinniarneqassaaq, tamanna Sermersooq Business Councilimit aamma Visit Greenlandimit ukioq kingulleq pilersinneqartuuvoq.
Nuummut takornariaqarnerulernissaa anguniarlugu taamatut suliniuteqartoqarpoq. Kalaallit Nunaanni illoqarfissuaq nittartakkakkut malunnartinneqassaaq, tassuuna takornariat ilisimareriissavaat suna Nuummi misigisinnaanerlugu.
#ColourfulNuuk uani qaammammi ingerlanneqassaaq, aamma ajugaasunik makitsisoqarumaarpoq. Eqqugassanut ilaapput soorlu Touring Greenland aamma Tupilak Travel aqqutigalugit angalaneq, Kangi Ski Centerimi imaluunniit Inuk Hostelsimi unnuineq. Seqinersiutinik aamma eqquisoqarsinnaassaaq kiisalu aamma Pisiffimmit pinnattoqarsinnaassalluni.